NIADTONG Mayo 31, gipahigayon dinhi sa Cebu ang national council meeting sa PDP-Laban, ang ruling party. Gipasar nila ang usa ka resolusyon nga kombinsihon si Presidente Rodrigo Duterte nga modagan sa pagka bise presidente ug mopili sa kandidato sa pagka presidente sa partido sa eleksyon sa 2022.
Gihimo usab dinhi niadtong Mayo 10 ang panagtagbo tali ni Energy Secretary Alfonso Cusi, usa ka Sugbuanon, ug sa lokal nga mga sakop sa PDP-Laban nga nipirma sa usa ka petisyon nga nag-awhag sa pangulo mga modagan sa pagka bise presidente.
Si Cusi, vice chairman sa PDP-Laban, maoy nagpatawag sa duha ka panagtagbo, nga matod pa ni Senador Manny Pacquiao, pangulo sa PDP-Laban, “unauthorized.” Iya pang gikasab-an si Cusi kay namulitika taliwa sa pandemic.
***
Apan nganong dinhi man ipahigayon sa Sugbo, sa tanang dapit, ang maong duha ka mga panagtagbo sa PDP-Laban? Nagpakita ba kini nga mahinungdanon ang Sugbo sa eleksyon sa 2022?
Sa presidential election sa 2016, si Presidente Duterte nidaog sa 47 sa 51 ka mga lungsod ug syudad sa lalawigan sa Sugbo ug nakakuha siya og kapin sa 1.1 ka milyon ka botos. Si Mar Roxas nakakuha lang og kapin sa 579,000 botos. Sa syudad sa Sugbo, kapin sa 296,000 ka botos ang nakuha ni Duterte.
Si Cebu Gov. Gwen Garcia, nga mitambong sa PDP-Laban meeting sa Mayo 31, miingon ngadto sa iyang mga kapartido, “You have underscored the importance of Cebu in the coming national elections.” Midugang siya, “judging from how Cebu can deliver, perhaps it might not be too much to say that where Cebu goes, so will the rest of the country.”