GISUGO ni Presidente Rodrigo Duterte ang kalihim sa Department of Health (DOH) sa pagtuon pag-ayo sa protocols nga gipatuman ni Gobernador Gwendolyn Garcia sa lalawigan sa Sugbo nga suma sa Inter-Agency Task Force (IATF) for the Management of Emerging Infectious Diseases nakasupak sa ilang gipatuman nga quarantine ug testing protocols. Unsa may gipasabot niini?
Nagtuo ba ang Presidente nga wala estudyuhi pag-ayo sa IATF ang executive order ni Gob. Garcia human sila mihukom nga dili patugpahon sa Mactan Cebu International Airport (MCIA) ang mga ayroplanong gikan sa gawas sa nasud? Makalibug kining IATF. Duna silay kasugo-an nga ila ra nga giusab kay wa magkadimao ug gisaway sa katawhan. Kining protocols nga gipatuman ni Garcia dakog matabang sa mga overseas Filipino worker (OFW) ug returning overseas Filipino (ROF). Wala usab modaghan ang mga kaso sa Covid-19 tungod sa mao niyang kasugoan.
***
Tugoti nga isaysay nako ang among bonding kun panaghugpong ubos sa gitawag nga new normal. Niadtong Sabado, si Dr. Billy Jaca nangimbitar sa usa ka panihapon kanamo ni Bobby Nalzaro, Raul Laurente, Jay Ruiz ug Atty. Eddie Barrita. Kuyog ni Dr. Jaca si Col. Rino Layao. Sama sa naandan, dihay daghang pagkaon. Ang akong nadeparahan inay magtagay sa paborito nga beer, usahay Johnny Walker blue or double black, red wine man ang gi-ablihan nga dugay kaayong nahurot ang duha ka botelya.
Tungod kay wa man magkita sukad nagsugod ang pandemic, mas daghan kaayo ang estorya sa topics sama sa pulitika, Covid–19, negosyo ug uban pa. Nagkasabot usab ang grupo nga buhi-on ang “Saturday Club” diin magkita-kita ang mga higala. Apan tungod kay kapin man kami sa 20, limitahan lang sa 10 ka tawo matag session nga himuon sa first come, first served nga ibasi sa response sa imbitasyon. Sa laktud nga pagka-sulti, ang bonding sa new normal mas daghan nang istorya kaysa tagay.
***
Nganong dili man nato hatagan og kasayon ang katawhan aron sila madani sa pagpabakuna? Ang mga local government units (LGUs) nangreklamo nga adunay daghang mga tawo nga nagdumili sa pagpabakuna. Nagkalainlaing hinuon ang ilang katarungan. Ang uban mahadlok lang og injection samtang ang uban wala magtuo nga makalikay sila sa sakit hinuno-a madisgrasya hinuon sila kon mabakunahan. Daghan usab ang buot magpabakuna apan walay alamag nga magpa-rehistro online. Nganong dili man mang-rehistro house-to-house ang city health department inabagan sa barangay sama sa gihimo sa ubang dapit? Dili ba diay mahimo nga maggahin og vaccination sites ang siyudad alang lamang sa mga walk-in? Kanang allocation sa vaccines, mabase man kana sa populasyon sa usa ka dapit ug dili lamang pinaagi sa online registration.
Ang ubang mga LGU manghatag og ganti sama sa house and lot, baka, groceries, bugas ug uban pa pinaagi sa raffles aron lang madani ang mga tawo sa pagpabakuna apan ang Cebu City moinsister gihapon sa ilang online registration. (mannyrabacal1144@gmail.com)