ORMOC CITY -- Usa ang patay ug duha ka mga bata ang gipangita atol ning pagsuwat tungod sa flash flood sa pipila ka barangay sa lungsod sa Calubian, Southern Leyte niadtong Martes sa gabii, Hunyo 1.
Base sa report sa kapulisan, ang duha nga gipangita mao sila si Brando, 7, ug manghod nga si Ruel Salino, 2, taga Barangay Padoga.
Matod ni Silvestre Delanter Jr., labaw sa Municipal Disaster Risk Reduction and Management (MDRRM) sa Calubian, diha sulod sa ilang panimalay ang duha ka magsuon kauban ang ilang ginikanan ug ubang igsuon.
Gibanlas sa flash flood ang ilang panimalay apan wa na maluwas sa ilang amahan ang duha ka mga bata hinungdan nga na-missing.
Samtang sa Sitio Tuboran, Barangay Casiongan, patay ang usa ka 51 anyos nga ginang human gibanlas sa baha sa dihang iyang giluwas ang binuhi nga baboy.
Giila ang biktima nga si Joselita Montemor, 51, kanhi sekretarya sa barangay.
atod ni Delantar, wala sila makasinati og kusog nga hangin pero grabe lang ang pagbunok sa uwan nga miresulta sa pag-awas sa tubig sa mga sapa.
Pipila ka mga barangay nga duol sa sapa ang apektado mao ang Casiongan, Jubay, Pal-og, Railes, Villalon, Mahait, Padoga, Villahermosa, Villanueva, Cabalquinto ug Ferdinand.
“Kasagaran sa mga naapektuhan light materials nga panimalay ug kadtong naa nagpuyo daplin sa dagat, maayo nalang gani kay di sab high tide,” matod ni Delantar.
Wala damha
Gitug-an usab ni Delantar nga mihimo na sila og early warning sa mga residente apan dunay uban nga wala maminaw.
“Kadtong mga balay daplin sa sapa mao sab naapektuhan kay di man gud maminaw og tagaan nato og early warning,” pasabot ni Delantar Gisulti usab ni Delantar nga, wala sila makahimo og preeemptive evacuation kay wala sab magtuo ang mga residente nga ingon ato kakusog ang pagbaha ug nga unang higayon pa nila nakasuway.
Atol sa kusog nga pag-uwan, maagian ang mga karsada sa lungsod. Samtang, wa maptol ang kuryente, tubig ug stable ra ang signal sa cellphone ug internet sa lugar.
Hinabang
Nanawagan usab si Delantar sa publiko nga nagkinahanglan karon og relief goods ug used clothing ang Calubian para sa mga biktima sa flash flood.
“Naa man gipang-andam pero basin kuwangon. Kung dunay makahatag namo, mas maayo unta hasta used clothing kay banlas gyod ang mga gamit ug panimalay sa uban residente,” matod ni Delantar.
Sa paghimo ning balita, nihubas na ang tubig baha sa lungsod ug nanguli na ang ubang residente nga naa pay kapuy-an. (JKDP)