USA ka simpleng graduation ceremony ang gipahigayon alang sa 96 ka mga benepisyaryo sa Pantawid Pamilyang Pilipino Program (4Ps) sa Matanao, Davao del Sur, alas 9 sa buntag, Huwebes, Hunyo 3, 2021.
Pinaagi sa Municipal Social Welfare and Development (MSWD), gihatagan og pasidungog ang mga benepisyaryo.
Nasayran nga kini ang unang higayon nga mi-graduwar ang mga sakop sa 4Ps.
Si Major Rhuel Barachina, hepe sa Matanao Municipal Police Station, maoy nanguna sa pagplastar sa programa sanglit usa siya sa Municipal Inter-Agency committee member.
Nasayran nga wala nay anak gikan 0 ka bulan ngadto sa 18-anyos ka tuig hinungdan nga dili na sila mahimong mahisakop sa programa.
Dako sab og tsansa ang uban pang wala mahisakop sa 4Ps sa ilang programa nga maapil na human nabakante ang 96 ka puwesto.
Ang aktibidad adunay temang "Pasidungog alang sa Kalampusan ug Kalambuan."
Dako sab ang pasalamat sa mga benepisyaryo sa pito ka tuig nga nagdawat sila og ayuda sa 4Ps sanglit nahuman na sa pagtungha ug nakakita na og trabaho ang ilang mga anak. (Orlando B. Dinoy)