Lihok sa mga tawo i-kontrol

Lihok sa mga tawo i-kontrol

APROBADO na sa Inter-Agency Task Force (IATF) on Management of Emerging Infectious Diseases ang hangyo sa lokal nga gobyerno sa Davao City nga ipailawom og balik ang siyudad sa modified enhanced community quarantine (MECQ).

Mismong si Department of Interior and Local Government (DILG) Davao Director Alex Roldan ang mikompirma nga aprobado na sa IATF nga mapailawom ang siyudad sa MECQ.

Kahinumdoman nga mihangyo ang siyudad nga ipailawom sa MECQ ang dakbayan gikan Hunyo 5 ngadto 30 tungod sa padayong pagsaka sa kaso sa Covid-19.

Niadtong Huwebes, natala sa Department of Health-Davao Center for Health Development ang pinakataas nga ihap diin anaa sa 441 ka dugang kaso.

Usa sa mga gikakurat sa mga opisyal sa panglawas ang padayon ug paspas nga pagtaas sa kaso, butang nga gitubag sa IATF ang hangyo sa siyudad nga ipailawom sa MECQ)sugod Sabado, Hunyo 5, hangtud Hunyo 20 ning kasamtangang tuig.

Ang siyudad giyahan sa regulasyon alang sa MECQ ubos sa IATF Omnibus Guidelines pinetsahan Mayo 20, 2021, ilabi na sa Pahina 9, Seksyon 3 ug sa Department of Trade and Industry (DTI) Memorandum Circular No. 21-19 pinetsahan Mayo 14, 2021.

Pinakapunto sa mga sumbanan naglakip sa paglimita sa lihok sa tanang mga tawo alang sa pagpalit sa panginahanglan ug mga establisemento ug trabaho sa maong establisemento (Sec. 3, IATF Omnibus Guidelines pinetsahan Mayo 20, 2021).

Nagbutyag sab kini nga bisan kinsang indibiduwal nga ubos sa 18 anyos ug kapin 65 anyos ang edad, persons with comorbidities ug mga mabdos nga babaye kinahanglan nga magpuyo sa balay, gawas lang sa mamalit og esensiyal nga panginahanglan ug serbisyo (Sec. 3, IATF Omnibus Guidelines pinetsahan Mayo 20, 2021).

Samtang sumala sa DTI memorandum, "pick-up and deliveries" puwede gihapong mag-operate, samtang 10 porsiyento ang operational capacity alang sa "indoor dining" ug 50 porsiyento alang sa "outdoor dining" ang gitugtan.

Ang lokal nga panggamhanan sa siyudad nanawagan sa mga mahimong maapektuhan sa MECQ zero operational capacity nga makig-alayon uban sa Trabaho Dabawenyo employment assistance sa City Mayor’s Office Special Project Office sa Magsaysay Park.

Dugang sa Siyudad nga tanang pampublikong transportasyon gitug-an nga mobiyahe.

Kasamtangan, anaa na sa 3,983 ang active cases sa dakbayan.

Sa bag-ong kaso, dunay 248 gikan sa Davao City ang pinakataas sa ihap, 78 sa Davao del Norte, 55 sa Davao de Oro, 41 sa Davao Oriental, 10 sa Davao del Sur, ug 9 sa Davao Occidental.

Dugang 6 ang namatay, diin 3 sa Davao City, 2 sa Davao del Sur, ug 1 sa Davao del Norte.

Samtang dugang 114 ang nakarekober, diin 40 gikan sa Davao del Sur, 40 sa Davao City, 16 sa Davao de Oro, 10 sa Davao Oriental, 7 sa Davao del Norte, 1 sa Davao Occidental.

Ang maong ihap dili ra sab layo itandi kagahapon ug nadugangan pa ang kaso sa Covid-19 sa Davao Region. (Uban sa taho ni Ralph Lawrence G. Llemit)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph