IPADAYON ni Cebu Governor Gwendolyn Garcia ang paghatag og tour packages alang sa mga turista nga gikan sa National Capital Region (NCR) ug silingang mga probinsya nga buot mosuroy sa Sugbo.
Kini maoy gipahibalo ni Garcia atol sa pakighinabi sa mga tigbalita niadtong Hunyo 3, Huwebes.
Human nga miluwat ang Inter Agency Task Force (IATF) sa Resolution 118-A sa Mayo 31 nga nagtugot sa point-to-point travel gikan sa NCR Plus paingon sa mga lugar nga gipaubos sa MGCQ.
Gihangop ni Garcia ang bag-ong kalamboan nga makasuroysuroy ang mga turista sa mga tourist destination sa kalungsoran.
Sanglit ang maong mga turista maoy usa sa target sa gilusad nga Suroy-Suroy sa Marso 2021, pipila ka adlaw sa wala pa ang Holy Week.
Sa maong kalamboan, gitinguha nga maghatag usab og dugang kita sa hotels ug tourism establishments taliwa ning pandemya sa nasud.
“Actually this opening up to leisure travel again to NCR will be a big boost to our hotels,” matod ni Garcia.
Sa uwahing kamandoan ni Garcia, medical certificate ug pagpasar sa symptoms checking na lang ang gikinahanglan aron makasuroy a tourist destinations sa probinsya. Giwagtang niya ang daghang dokumento nga rekisitos. (ANV)