NAGTINGUHA si American boxing legend Floyd Mayweather nga tabangan ang iyang kababayang si Errol Spence Jr. sa pagpakigbatok niini kang Filipino boxing icon Manny Pacquiao karong Agusto 21, 2021 sa Las Vegas.
Si Mayweather, kinsa mosagubang og exhibition bout karong Hunyo 6, 2021 batok kang YouTube superstar Logan Paul, nagkanayon nga gusto niyang modaog si Spence ning awaya hinungdan nga gusto niyang motabang.
“I wish them nothing but the best,” matod ni Mayweather sa usa ka interbyu nga napatik sa www.philboxing.com. “I’m high on Errol Spence, I’m behind my people first and always so of course I want to see Errol Spence win.”
Si Mayweather maoy usa sa pipila lang nga nakapilde sa Pambansang Kamao ng Pilipinas ug iya kining nahimo niadtong 2015 pinaagi sa unanimous decision.
Gipasabot ni Mayweather nga dihang wala pa’y bakus si Spence, nakadayeg na siya sa abilidad ug gitagna niyang mahimo kining usa ka world champion.
Tuod man, si Spence maoy kasamtangang welterweight champion sa World Boxing Council (WBC) ug International Boxing Federation (IBF) nga iyang isugal sa iyang pagpakigbatok kang Pacquiao.
Si Spence, 31, gikonsiderar nga dakong inilog batok sa 42 anyos nga si fighting senator apan bisan pa niini, gusto ni Mayweather nga motabang kang Spence aron maseguro niini ang kadaugan.
“Actually, I’m going to call him and give him some pointers. I want to see Errol Spence win,” asoy ni Mayweather. (ESL)