GIBALANSE ang panglawas ug ekonomiya. Gibalik ang turismo, gipalambo ang agrikultura, Sugbo negosyo program, micro-business ug gitabangan ang buot monegosyo sa food production. Gipahimugso ang Sugbusog nga mananom ang tanan. Makabusog nga dili mamalit, makalig-on pa sa immune system aron makalikay sa sakit.
Gilusad sa miaging tuig gikan sa household, purok, barangay, lungsod, siyudad ug eskuylahan ubos sa tema, “Estudyanting busog, luwas ug himsog.” Gahin nga P100,000 sa barangay ug P1 milyunes sa lungsod o siyudad para sa pag-ugmad og plant nursery ug pagpalit sa lainlaing liso sa utanon.
Lakip sa Sugbusog ang pagpamuhi og isda, manok ug ubang kahayopan.
Gidayeg si Gov. Gwendolyn ‘Gwen’ Garcia sa iyang praktikal nga pagdumala sa pandemiya. Gitan-aw dili lamang ang panglawas kondili sa laing aspeto sa panggobyerno.
Niadtong Pebrero, wala mouyon sa rekomendasyon sa tulo ka consultants sa Department of Health (DOH) nga ipaubos og balik sa lockdown ang Sugbo.
Gibasi sa probisyon sa Local Government Code nga naghatag og gahom sa LGU sa pagdumala sa lokalidad atol sa emerhensya.
Gipaluagan nga wala nay penalty sa dili mag-facemask, hinuon hatagan niini. Dili lisudlisoron ang mga turista nga nabakunahan sa ilang nasod ug negatibo sa swab test. Ipa-swab test gilayon ang mga overseas Filipino workers (OFW) nga moabot sa Mactan Cebu International Airport (MCIA). Kon negatibo, makadiretso og pauli sa pamilya ug i-swab test pag-usab sa LGU.
Sa Inter-Agency Task Force (IATF), ipa-swab test inig ikapito ka adlaw. Kon negatibo papaabuton og laing pito ka adlaw aron pagkompleto sa 14-day quarantine.
Salikwaot ang mando ni Executive Sec. Salvador Medealdia nga divert ang international flights nga moabot sa MCIA ngadto sa Ninoy Aquino International Airport (NAIA). Dakong impact sa ekonomiya.