PADAYON ang pag-abli og bike lanes sa dakbayan sa Sugbo. Mga bike lane nga kanunayng gihulga sa mga motorista nga kulang sa pagpakabana sa kaluwasan sa mga siklista. Ang mga post sa social media nagpakita sa daghang kalapasan sa katungod sa mga siklista.
Hinuon, ang uban dali kaayong makakita og katarungan, kay kuno apiki ang karsada ug ang bike lane dali nga ipatuman. Magamay o dako ang karsada kong kulang sa respeto, mao ra nang estoryaha. Ang importante unta ang pagsinabtanay aron kita motunhay.
Unsa man gud intawon ang dag-anan nianang nagtindak ikuntra nimo nianang mga de makina? Pastilan, kanang uban diha nga nagbisiklita gikan pa sa layong dapit, nagpasingot aron maka-report sa trabaho. Ulan ug init tawon ang ilang giantos matag adlaw, wala pay labot sa abog ug aso nga ilang masingo.
Hinuon dili tanang nagmaneho og motorsiklo ug ubang sakyanan ang badlongon. Naa say daghan nga makamaong mosabot. Motanyag pa man gani ang uban og tabang pinaagi sa pagkarga sa bisiklita sa ilang sakyanan uban sa nagtindak aron lang madali og abot sa ilang trabahoan. Kana pa lang unta ang buhaton sa uban ilabi na niadtong nagmaneho og mga pick-up nga modelo sa sakyanan.
Hisgot ta og bisiklita, sa mga gustong magpasingot sa adlaw nga way trabaho, akong ipahibalo dinhi nga ang gikalingawan nga destinasyon nga mao ang Campo 4 sa siyudad sa Talisay angay nga patalinghugan.
Nakonpirmar nako ni katong bag-o. Nituyo ko og mata og sayo aron saksihan ang pagbaha sa mga siklista sa maong dapit. Tinuod gyud ang akong nadunggan nga ang maong dapit daw balay sa putyokan nga gihugpaan sa daghang siklista ilabi na sa Sabado ug Domingo.
Didto akong nailaila ang amahan ug anak nga siklista nga sila si Carlon ug Dominique Mendoza nga taga Tabunok, Talisay City. Kauban nila si Enicka Echavez nga taga Dumlog ug Jomar Capada nga taga Linao. Sa ilang upat si Enicka maoy pinaka bag-o nga siklista. Sa miaging Abril pa siya nagsugod pagtindak. Matod niya nga gawas sa exercise, nakahigayon pa gyud siya paghanggap og preskong hangin nga maoy gidalit sa hilabihan ka berde nga palibot.
Ang ruta sa mga siklista gitung-an sa mga bukid nga dasok sa kakahoyan. Aspaltado ang karsada ug dili sab daghan ang mga sakyanan nga moagi. Mao ni ang short cut nga ruta kon mobiyahe ka padulong sa Toledo City agi sa Manipis Road. Ang kanhi nipis kaayo nga karsada, karon lapad ug aspaltado na. Kay nindot ang view sa maong dapit usa ni sa rason nga si Mark Zyril Alerta nga taga Basak, Lapu-Lapu City nasum-ok dinhi sa unang higayon.
Matod niya, nituyo siya pagtindak padung sa Campo 4 tungod sa daghang sugilanon nga iyang nabati sa kanindot sa dapit. Samot ang pagdayeg kay sa iyang biyahe, nabuk-an siya og pedal. Dali rang nasulbad ang iyang problema kay daghan ang namaligya didto.