FRUIT monster akong tawag sa akong kaugalingon kay mahilig man ko mokaon og bisag unsang klase nga prutas kada human og kaon.
Karon lang bag-o, pagbisita nako sa akong mananambal, nakuyawan ko kay kalit mang misaka ang akong blood sugar nga puro man unta prutas akong gipangkaon.
Akong doktor nangutana nako kung unsang klase mga prutas akong gikaon unya dinhi nahibaw-on nga kasagaran sa akong gipangkaon subra ra katam-is nga maoy nakapasamot hinuon pagpataas sa akong sugar.
Iya kong gipasabot nga ang mga prutas maoy labing maayong pagkaon kay makatabang kini og pahimsog sa lawas kay daghan kini og fiber, bitamina ug mineral unya makapalayo sab sa sakitsakit sa kasingkasing ug cancer. Apan daghan sab diay’ng mga prutas nga puno sa kamay (sugar) nga angay likayan.
Matod sa National Institute of Diabetes and Digestive and Kidney Diseases kini nga mga prutas ang pahinayhinayan og kaon labi na niadtong kandidato sa diabetes: watermelon, dried dates, pinya, manga, ubas ug hinog nga saging. Kung mahimo gamay ra gyod nga hiwa ang kaunon ini.
Sunod kining mga preskong fruit juice sama mango juice, orange juice ug pineapple juice.
Hinuon kining mga prutasa nga lugom og kolor (puwa, asul ug purple) maoy ilang girekomenda kay gamay ra kini og kamay: mansanas, avocado, blue berries, strawberries, cherries, kiwi, cantaloupes, kapayas, pears.
Sa isud-an, kini sab ang ilang girekomendang kan-unon: fatty fish nga taas og Omega-3 sama sa salmon, tuna, ug mackerel, mga berding utanon, itlog, chia seeds, beans, nuts, olive oil og vinaigrette para sa salads.
Kung karne sab ang hisgutan, pilion tong mga karne nga wa kaayo’y tambok sama sa manok, isda uog itlog.
Pagkat-on sab og lutong bahay kaysa restaurants kay kasagaran taas og calories, sodium ug saturated fats.
Katapusan, minusi ang paggamit og mantika sa pagluto. Mas maayo ang isugba, nilung-ag o bake unya kanunay mag-ehersisyo kada adlaw sama sa paglakaw, jogging o bisiklita.