GAWAS sa pandemiya, dili kakompiyansahan ang transisyon sa panahon, hinapos sa ting-init ug nag-ung-ong nga ting-ulan. Kalitkalit ang kausaban sa klima. Gani, ang pipila ka komon nga sakit ning panahona mas daghan pa ang nakalas kon itande sa Covid-19.
Apan atong naobserbahan nga nakatutok pag-ayo ang mga opisyal ug awtoridad sa panglawas sa kampanya batok sa Covid-19. Nigahin og igong panahon ug dakong pundo. Dili kini sayop apan nasubrahan. Nataligam-an ang ubang sakit.
Sa miaging tungatunga sa ting-init, wala kita makadungog sa taho gikan sa Department of Health (DOH bahin sa naandang sakit tungod sa klima.
Daghang nangamatay, apan sama sa nahulog tanan tungod sa Covid-19. Tungod ba kaha sa budget sa mga ospital alang sa Covid nga pasyente gikan sa PhilHealth? Makaduda lang.
Nabaniog karon mao ang kampanya sa pagpabakuna batok sa Covid-19. Magpasalamat kita nga niabot sa atong dapit ang Sinovac sa China, AstraZeneca gikan sa United Kingdom ug Sputnik V gikan sa Russia.
Igo na ang subrang pagtutok sa Covid. Tutokan ma usab ang ubang komon nga sakit nunot sa panahon, samtang ipadayon ang pagpatuman sa standard health protocol.
Ang DOH dunay tinuig nga kampanya sa sakit nunot sa ting-uwan. Ang mosquito-borne diseases sama sa malaria ug dengue, cholera, typhoid fever, hepatitis A ug uban pa.
Wala kitay nadungog nga pagpangandam sa lokal nga kagamhan bahin niini. Kon dili mahatagan og igong pagtagad ug pagpangandam, mas risgo ug kuyaw pa kini kon itande sa Covid-19.
Labaw nga dakong problema sa nasod kon simbako mosiaw ang sakit nga dala sa klima, samtang nagpabilin pa ang pandemiya. Komplikado na.
Hagit sa lokal nga kagamhanan ug DOH nga mag-pro-active. Sayri ang katawhan. Dili lang bahin sa pandemiya kanunay.