TALIWALA sa kainit nga nasinati, wa kini makapugong sa kahinam sa mga swimmer nga molangoy alang sa 1st Pablo John ‘PJ’ Garcia open swimming challenge nga gipahigayon sa public beach sa barangay Tajao, lungsod sa Pinamungahan, Hunyo 5, 2021.
Ang swimming challenge ang labing unang dako nga swimming event nga nahitabo sukad nga nikuyanap ang Covid-19 pandemic nga nipahunong sa tanang matang sa sports lukop nasod.
Dul-an sa 200 ka mga swimmer ang ni apil sa maong kompetisyon nga naggikan pa sa nagka lain-lain lugar sa probinsya sa Sugbo.
Ang nidaog sa 500-meter Men’s Division Open Water Challenge mao si Ely Genon, 37, usa ka mangigisda, lumulopyo sa maong dapit
Matod ni Genon nga pangisda na ang iyang namat-an nga trabaho sukad pa sa iyang pagkabata mao nga anad na kaayo siya sa pag langoy sa dagat.
“Sukad 10 anyos ko, Sir, panagat na gyud akong trabaho dinhi sa amo (Pinamungahan) mao sab tingali nga kusog ko mo langoy,” matod ni Genon.
Dugang niya nga mapasalamaton siya ni Garcia sa iyang nadawat nga premyo ug iya kining ipamalit sa kinahanglanon sa iyang pamilya.
Sa P2,000 para swimming o kategoriya sa mga persons with disability (PWD), nidaog si Arnold Bais, kinsa myembro sa Philippine Para Swimming niadtong 2001. Siya mirepresenta sa Pilipinas sa Asean Games sa Malaysia diin nakuha niya ang gold medal sa first Asean Para games.
Giawhag usab ni Bais ang sama niya nga mga PWD nga nga mo apil sa sports nga swimming kay anaa ra sila nga mo suporta alang sa mga athletes.
“We are here to inspire sa mga tao especially katung naay mga disability pud nga mauwaw sila ba, this is one way nga pwede sila mo excel sa swimming kay daghan mang tubig sa atoa,” saysay ni Bais.
Si deputy speaker ug third district Representative Pablo John Garcia, nga maoy nagpasiugda sa event wala mag paulahi ug niapil usab sa 500 meter race.
Matod ni Garcia nga namugna niya kini nga event aron iarangkada pagbalik ang kalihukan sa maong sports sa probinsya sa Sugbo.
“Nag tuo ko nga ang mga tao karon uhaw na sa sporting events tungod sa pandemya. Ug ikaduha is to promote the sports and a healthy lifestyle,” padayag ni Garcia.
Ang maong event gitambongan nila ni Cebu City Councilor Joel Gargarena, Pinamungajan Mayor Glen Bariquatro, ug mga celebrity guest nga sama nila ni Bisrock Legend Insoy Ninal ug ni Vispop Icon Kurt Flick. (JDS)