Corpus Christi B, 06 Hunyo 2021: Exodo 24:3-8; Salmo 116; Hebreo 9:11-15; ug Marcos 14:12-16, 22-26"
Niadtong Abril 14 may nagsugod og usa ka “community pantry’’ didto sa Quezon City. Ang ilang panawagan mao: “Paghatag segun sa mahatag, kuha segun sa panginahanglan.” Daghang nadasig sa maong buhat, lakip na ang pipila ka mga parokya. Gisuwayan pod ni namo. Nagtukod kami og gamay nga lamisa sa among gymn ug gibutangan namo og atop-atop. Gipahigayon kini sa Miyerkules, Biyernes, ug Dominggo.
“Pan-Punoan” ang angga nako niini, usa ka dula sa mga pulong sa lninglis. Apan dili kaayo kini layo sa kamatuoran tungod kay ang maong buhat, kon maampuon ug maayo ang dagan, posible mahimong sinugdanan sa usa ka kalihokan nga makapabusog dili lamang sa tiyan kondili sa kinabuhi sa katilingban. Mahitabo kini kon mapalambo ang diwa sa paghinatagay ug pag inambitay. Babag niini ang “dole-out” nga kinaiya ug ang pagdinalo.
Gihan-ay ug gipangandaman ang kataposang panihapon ni Jesus ug sa iyang mga disipulo. Gani aduna siyay kasabot daan sa Jerusalem - ‘’usa ka tawo nga naglukdog usa ka tadyaw nga tubig” - nga maoy sundon padulong sa balay nga pagasaulogan sa Pangilin sa Pagsaylo. Gipakitaan sila sa tag-iya sa balay og usa ka “dakong lawak sa itaas,sangkap sa mga gamit ug andam na”.
Sa ilang pagpanihapon gipahiluna ni Jesus ang pagkaon alang sa kalag -ang pan ug bino nga nahimong iyang lawas ug dugo nga “giula alang sa kadaghanan” nga sa Hinebreong pagsabot, alang sa tanan. Nagpadayon ang paggamit sa maong mga pulong panahon sa Misa. Gisaulog karong adlawa kining dako ug dimatukib nga misteryo sa atong kaluwasan. Mao nga kita mapasalamaton sa maong misteryo, nga sa pinulongang Griyego, mao ang “eyukaristiya”.
Gihisgotan sa Exodo ang panghitabo sa kasaysayan sa mga Israelita nga maoy nagpaluyo ug maoy “gihimong hingpit sa halad ni Jesus sa iyang kaugalingon. Gitukod sa Dios ang Kasabotan tali kaniya ug sa iyang katawhan. Naghalad og mga halad nga sunogon ug mga inihaw nga torong baka ang mga lsraelita. Ang dugo sa mga toro gisablig sa halaran aron timaan sa pagpahigayon sa Kasabotan. Nagpadayag ang Dios sa iyang balaod nga nagpahayag sa iyang kabubut-on. Ug misinggit ang tanan: “Tumanon namo ang tanang gisugo sa Ginuo ug sundon namo siya.
Masubay nato dinhi dili lamang ang gigikanan sa paghalad ni Jesus sa iyang kaugalingon, kon dili ang angay natong tubag sa maong misteryo sa kaluwasan. Mihatag ang sulat ngadto sa mga Hebreo og espirituhanong kalambigitan, ang paghalad ni Jesus sa iyang kaugalingon ug ang paghalad sa mga mananap. Kon makahinlo man gani ang dugo sa mga mananap, “unsa pa kadako ang nahimo sa dugo ni Cristo’!... Ang iyang dugo maoy maghinlo sa atong mga konsensya sa walay kapuslanang mga buhat, aron mag-alagad kita sa buhing Dios.”
Matag saulog nato sa Misa gipahigayon sa misteryo sa atong kaluwasan diin si Jesus nahimong Pangulong Pari nga wala nay makatupong ang pagkabalaan ug pagkaepektibo sa pagtubos sa mga makasasala. Siya ang tinuoray nga pan-punoan nga way hunong ang paghalad ug paghatag.