Nakasuway na ba mo nga masunogan og trak didto sa lungsod sa Liloan unya inig labay sa pipila ka bulan, ikaw na hinuon ang gikihag arson sa mga bombero?
Mao kini ang nahitabo sa akong amigo. Unsaon nga wala man modugo. Bisag pahalipay lang unta sa mga bombero nga nipawong sa kayo nga nakaugdaw sa maong trak.
Naa man untay investigation report nga nag-ingon nga accidental ang maong sunog. Apan unsaon nga sa ngadto-ngadto, nahimo man hinuong arson.
Sa pagkakaron, kining akong higala nakahunahuna nga mokiha na lang ug nakigkonsulta na sa usa ka inila nga abogado. Inig sang-at unya sa kaso, ato kining hisgutan dinhi sa atong lindog apil na ang ngalan sa maong mga sakop sa kabomberohan.
BISE-PRESIDENTE?
Daw seryuso ang tinguha sa mga sakop sa PDP-Laban sa pag-awhag ni Presidente Rodrigo Duterte nga modagan alang sa pagka-bise presidente. Apan dili ko motuo nga tinud-on kini.
Naa koy pipila ka rason nganong di ko motuo.
Una, gibuhat lang kini aron wanihon si Sen. Manny Pacquiao. Tuyo niini nga mapapas si Pacquiao isip usa ka lig-on nga presidentiable. Dako man gud nga bentaha kon ang Pacman maoy mag-apod-apod unya sa certificate of nomination and acceptance (Cona) sa PDP-Laban.
Bisan pa man, palpak ang kalaki ni Sec. Alfonso Cusi dinhi sa Sugbo ug niguwa hinuon nga palpak sa iyang trabaho tungod sa grabing blackout sa Luzon. Nisaad diay kining palpak atol sa usa ka public hearing sa Senado nga way mahitabong blackout sa Mayo ug Hunyo.
Ikaduha, tuyo sa maong kalihokan nga mabuhi ang dugo sa mga tiguwang nga mga opisyal ni Presidente Duterte. Nakahibawo na man kita nga kon ma presidente si Davao Mayor Inday Sara, magtudlo kini og bag-ong mga opisyal. Mapapas ang mga tiguwang nga bata-bata ni Digong.
Ikatulo, di man PDP-Laban ang Partido unya ni Inday Sara. Kon gusto kita makahibawo, nindot nga bantayan ang iyang mga kaalyado nga namisita kaniya sa Davao.
Didto ang Bongbong ug Imee Marcos. Didto sab si Gibo Teodoro. Dili man kini sila mga sakop sa PDP-Laban.
Ikaupat, dili maayo nga ang kandidato alang sa pagka presidente ug bise presidente gikan lang sa usa ka pamilya. Luod man gud. Nagsigi og panaway si Digong sa mga kaatbang nga dynasty. Apan ang tandem nga pulos Duterte dakong ehemplo sa usa ka dynasty.
Di sab maayo nga ang tandem maggikan sa Mindanao. Oportunidad kini sa addition. Busa usa ka dakong bloke sa politika dapat sama sa mga Marcos nga makadala sa Solid North ug sa Region 8. O sa kampo ni GMA nga lig-on sa Central Luzon ug sa Visayas. (DM nako sa @anol_cebu)