Hinay ang paghangop sa amnesty program sa Traffic Enforcement Agency of Mandaue (Team) sa storage fees sa gi-impound nga mga sakyanan.
Tulo lang ka mga sakyanan ang gilukat gikan sa 1,487 nga na-impound gikan sa 2015 ngadto 2020.
Niadtong Mayo 3, 2021, giimplementar ang amnesty program nga maghatag og diskwento sa storage fees sa na-impound nga sakyanan pinaagi sa ordinansa nga gipangamahanan ni Konsehal Jimmy Lumapas, chairman sa committee on transportation sa Konseho sa Siyudad.
Miingon si Edwin Jumao-as, executive director sa Team, nga human sa 30 ka adlaw usa ra ka motorsiklo, usa ka awto, ug usa ka trailer truck ang gipanglukat.
Matod ni Jumao-as nga nakabayad ang mga tag-iya og P20,000 alang sa motorsiklo, P15,000 alang sa upat nga ligid nga awto, ug P90,000 alang sa trailer truck.
Ang storage fee mokabat ngadto sa P500 ang adlaw.
Matod ni Jumao-as nga adunay usa ka kompaniya nga niadto sa ilang opisina aron mosusi sa ilang bayrunon aron malukat ang 10 nila ka mga moderno nga tricycle nga gi-impound sa Team ug misaad kini nga lukaton sa Hunyo 4, 2021.
Si Jumao-as niingon nga makabayad og P421,000 ang kompaniya alang sa 10 ka mga moderno nga traysikol labot na ang diskwento niini.
Hangtod sa oras sa pagsuwat, niingon si Jumao-as nga gihulat pa nila nga bayran kini sa kompaniya nga nisaad nga sa Hunyo 4, ug kon dili nila kini malukat, lakip kini sa idonar ngadto sa barangay o sa ubang mga opisina sa gobyerno.
Bisan kon hinay ang paghangop sa amnesty program, niingon si Lumapas nga ipadayon gihapon nila ang mga nalatid sa ordinansa nga i-donar ang mga magamit pa nga gi-impound nga sakyanan.
Matod niya nga wa usab siya nakadawat og mga hangyo gikan sa mga tag-iya nga ipa-extend ang amnesty program.
Sigon ni Lumapas nga kini nagpasabot nga wala nay gusto ang mga tag-iya nga molukat sa ilang mga sakyanan.
IDONAR
Sa iyang bahin, miingon si Jumao-as nga ilang tan-aw nga kadaghanan sa mga tag-iya sa mga na-impound nga sakyanan naglisod sa pinansyal labi na sa panahon sa pandemya.
Dugang niya nga nakita sab niya nga ang ubang mga motorsiklo wa pa maimpas sa installment.
Inay nga lukaton kini, mobayad sa storage fees ug sa installment, sigon ni Jumao-as nga ila na lang kining gi-downpayment aron molukat og bag-ong motorsiklo.
Human sa amnesty program, gipahimo ni Lumapas ang Team og listahan sa mga sakyanan nga mamahimo pang mapahimuslan ug madonar ngadto sa kabarangayan ug sa ubang opisina sa gobyerno.