SAMTANG nagprograma inyong ubos nga higala sa Kontra Balanse sa DXOW Biyernes, Hunyo 4, 2021, kalit lang atong nabasa sa live streaming gikan sa kanunay naglantaw sa atong tulumanon, Mr. Carlo Doller, nga nag-confirm nga patay na daw si Davao del Sur Governor Douglas "Dodo" Cagas.
Ako nga wala gyuy balita nga na-admit si Governor Cagas sa hospital nakalitan nga diretso ang balita nga patay na.
Pagkatapus sa atong programa akong gitawgan si JAY EGINGCO, ang kasamtangang manager sa CHARM RADIO nga gipanag-iya usab sa governor, ug ang tubag, dili tinuod. Hinuon grabe ang iyang kahimtang.
Human sa akong programa, gibakwi nako ang report ni Carlo Doller nga tingali namonitor lang pod ni niya sa ubang station. Mao nga sa programa na ni Edgar Candia, atong gipamatud-an nga dili tinuod nga patay na si Cagas. Pero gikan dinhi, nagsunod-sunod ang tawag sa akong cellphone ug mga text nga patay na gyud kuno si Gov. Cagas, kay gi-report sa usa ka sibyahanan dinhi sa dakbayan sa Davao sa ilang reporter nga nakabase sa nahisgutang probinsiya ug gawas niini, ato usab nakita nga iyang gi-post sa Facebook.
Dinhi ato na usab gitawagan si Egingco kon tinuod ba ang gibalita sa usa ka reporter. Apan sa ikaduhang higayon negative, sumala pa niya kay nag-anam-anam na sa pag-recover ang gobernador.
Hinuon, dili nato mabasol ang maong reporter tungod sa "rating game" sa mga sibyahanan dinhi sa atong dakbayan sa Davao. Paunhanay kon kinsay una gyud nga nahibawo ug unang makahatud og balita sa kahanginan mao nga bisa'g buhi pa, patyon dayon pinaagi sa balita.
Ang dapat natong hunahunaon nga bisa'g ikaw pay pinakaunang nakahatud og balita sa kahanginanan, wala gihapon nimo mapahibawo ang tanang katawhan sa Davao City kay dunay daghang mga radio station nga didto usab sila naminaw, bisa'g number 1 ka pa. Timan-i nga dili tanang mga tawo diha sa imo naminaw.
Adunay 15 ka AM radio stations ang Dakbayan sa Davao, ang lima niini wala na mag-operate, ug ang usa, none commercial. Ang buot ipasabot, siyam na lang ang atong mabati sa kahanginan ug kini pulos nangandoy og number one. Mao nang paunhanay ug kinsay unang makauna sa paghatud og balita.
Mao nga sipyat intawon ang usa ka reporter. Pero nagpasalamat na lang pod ang ilang tigpaminaw kay ila mang giangkon ang kasal-anan sa ilang reporter. Ang ato lang, nga dili mo-file og libel si Gov. Cagas kay gawas niining reporter, damay ang sibyahanan.
Pero dako ang atong pagtuo nga dili na ni daginuton sa atong gobernador. Pero kinahanglan mangayo og pasaylo ang reporter, lakip na ang management sa maong sibyahanan. TAWO LANG TA UG DILI PERPEKTO. Ang impotante, angkunon nato kon diin ta dapit nasasyop.
Usa ni ka dakong pagtulun-an nato nga ania niining trabaho-a nga dili na bali kon maulahi sa balita, basta insakto ug kompleto sa detalye. Pero dili gyud kalikayan nga ang maong SAYOP NGA REPORT GIKONDENA SA KATAWHAN SA DAVAO DEL SUR. Kini gumikan sa ilang pagmahal ug pagpangga sa ilang gobernador. Get well soon, governor!