GINAINGON nga ang kaugmaon sa usa ka republika anaa sa mga kamot sa matag botante. Usa ka botante, usa ka boto. Kadtong mga tawo nga gusto og kausaban, balota mao ang angay nga kahimanan, dili bala.
Ug matod pa ni Manila City Mayor Isko Moreno, sa usa ka demokrasya, ang mga tawo maoy mopili sa ilang lider, di kay ang lider ipamugos ngadto kanila. “Ang demokrasya ang taumbayan ang pumipili, hindi ipinipilit yung mga kalahi niya,” matod pa ni Moreno.
Di sama sa usa ka monarkiya kansang korona mahimong kabilin nga masunod sa mga anak ug mga kaliwat sa mga hari ug rayna. Mahitabo kana kay sa usa ka monarkiya, way eleksyon ug di mopatigbabaw ang kabubut-on sa katawhan.
Apan ang tanan posible nga mahitabo sa usa ka demokrasya. Bisan gani ang mga anak og presidente nahimong mga presidente. Sama ni John Adams, ikaduhang presidente sa Estados Unidos (1797-1801).
Ang iyang anak, si John Quincy Adams, nahimong ika-unom nga presidente (1825-1829). Ang anak ni George Bush, ika-41 nga presidente sa US (1989-1993), si George W. Bush, nahimong ika-43 nga presidente (2001-2009).
Dinhi sa Pilipinas, ang anak ni kanhi Presidente Diosdado Macapagal (1961–1965), si Gloria Macapagal-Arroyo, napili sab nga presidente (2001–2010). Ang anak ni kanhi Presidente Corazon Aquino (1986–1992), si Benigno 'Noynoy' Aquino III napili sab nga presidente (2010-2016).
Wa pa mapresidente si Ferdinand “Bongbong” Marcos Jr., ang anak sa kanhi diktador nga si Ferdinand Marcos. Apan karon, dunay mga pundok nga miduso kang Davao City Mayor Sara Duterte, anak ni Presidente Rodrigo Duterte, nga padaganon sa pagkapresidente sa 2022 elections.
Si Albay Rep. Joey Salceda niingon nga wa siyay pagduda nga modagan ang mayor sa siyudad sa Davao sa pagkapresidente. Sanglit ang ruling PDP-Laban mipasar na og resolusyon nga nag-awhag kang Presidente Rodrigo Duterte nga modagan sa pagkabise presidente, posibleng mahitabo ang usa ka Duterte-Duterte tandem.