NAHIBULONG ko kon unsay gikagubtan sa mga tawo daplin sa karsada sa miaging semana. Daw may alarma nga disgrasya sa karsada. Sa akong pagsusi, baktin diay nga nagdagan. Talagsaon nga eksena niadtong buntaga. Diriyot gani masaghiri ang baktin sa namasahero nga e-bike. Iyang gigukod ang usa ka tawo nga nagkadusingot. Nagdali ko nga nisunod.
Nihangyo ko nga ma-interview ang tag-iya sa baktin. Nakuryoso man gud ko sa akong nakita. Kay sa tinuod, nakabasa nako og post sa social media labot sa baboy nga gihimong pet o binuhi sa iyang amo. Ibay sa alad papuy-on ang baboy sa sulod sa ilang balay, nagpasopaso ug may kaugalingon pa nga katulganan.
Wa gyuy kalainan sa binuhing iro ug iring.
Salamat kay gipatalinghugan ang akong hangyo. Matod ni Rolando Arnejo, 50 anyos, matag buntag niya isuroysuroy ang iyang walo ka semana nga baktin kay mao na ni ang naandan matag buntag nga tanan. Paagi pud ni nga kong maluya na ang baktin, magpuyo na ni sa iyang alad human makakaon. Apan nganong magsunodsunod man niya ang baktin?
“Ang hayop Sir, basta imong i-train, makat-on gyud kadugayan,” pasabot ni Rolando diri kanako. Tinuod na. Labi na sa iro nga daghan kaayo og makat-onan. Apan sa baktin, daw talagsaon. Sa asoy ni Rolando dinhi nako natugkad nga siya ug ang iyang baktin duna gyuy espesyal nga relasyon. Nagsugod ni sa dihang nanganak ang iyang anay.
Kini nga baktin usa sa nagsakit. Nagkalibang. Sa tinguha nga mabuhi, iyang gigatas hangtod nga naulian. Gikan niadto, iyang namatikdan nga hilabihan na kaparaygon sa baktin.
Iyang gisulayan og pagawas sa tangkal ug gisuroy. Natingala siya kay mosunod bisan asa siya moadto. Dinhi na siya nakahunahuna nga lahi ni nga klase sa pagka baktin, mao nga nakahukom siya nga dili iapil og baligya.
Mao to nakahunahuna siya sa paghingalan sa baktin nga Landix. Gikan ni sa iyang angga nga Lando. Sa mga tawo nga nakasaksi sa parayeg og pagsigi og sunod ni Landix sa iyang amo matag baktas nila sa karsada, daghan sila og nahunahunaan. Basin magdala nig suwerte sa iyang amo nga wala na maka-drive og dyip tungod sa pandemiya.
Igo lang ningisi si Lando ning ilang pangagpas. Ang importante nga nakahukom na siya nga buhion si Landix hangtod sa hangtod. Bisan unsa pay mahitabo, dili niya ibaligya si Landix nga sa iyang pangidaron, pwede na ra ba unta mahalin para lechon de leche. Sa gustong makakita ni Landix, palihug sa pagsubay sa atong Youtube channel: junrey nadela password tv.
Sa mga mahiligon og sakyanan, may ipaambit ko ninyo nga kalihukan nga akong gitambongan niadtong Sabado, Hunyo 5. Ang akong bag-ong higala nga si Kharl Lataza, usa ka car enthusiast, nidapit nako pagsaksi sa Bumper Bumper Car Show. Didto ni gihimo sa parking area sa Mactan Airport gikan sa adlaw Sabado hangtod gahapon, Hunyo 6. Duha ka entry ang iyaha ni Kharl. Pulos high end nga mga sakyanan nga tagsa rang igkita sa karsada.
Ang usa ka sports car nga made in Germany. Ang usa hinimo sa Estados Unidos. Ang ubang entry di sab palupig. May mga pick up nga sakto sa kargada nga mahimong mosawom sa sapa, mokatkat sa bukid ug motadlas sa pinakalisod nga dalan. May mga Sports Utility Vehicle nga gi-lift up unya giparisan og mga ligid ug yantas nga lisod hitupngan sa ka nindot.
Akong kauban sa BoSS nga si pare Rene Ybañez, naghilomhilom lang nisalida sa iyang duha ka entry alang sa sound enthusiast category. Sa among grupo, usa ni si Pare Rene nga mahiligon sa music, way duda nga samtang siya mag-drive, ang sulod sa sakyanan daw music room tungod sa sound system nga gipahaum. Mga pahalipay sa mga organizer sa ika-10 season nga Car Show. Ingon man sa mga nisalmot nga nipasundayag sa subra sa usa ka gatos ka sakyanan.
Hinumdum ko niadtong panahon sa Grade 1 sa amo sa probinsiya. Matag piyesta, pusilpusil ug sakyanan maoy kanunay ang naa sa hunahuna nga ipapalit sa akong inahan. Kon dili palitan, luthang ug basiyo sa lata sa gatas himuong taraktarak.