MAKASINATI og madag-umon ug pag-uwan ang Metro Cebu sa mga mosunod nga adlaw human opisyal nga gideklarar sa Philippine Atmospheric Geophysical and Astronomical Services Administration (Pagasa) ang pagsugod sa ting-uwan sa tibuok nasod.
Apan, si Jhomer Eclarino, Pagasa-Mactan weather specialist, nagkanayon nga sama sa ubang mga lugar sa nasod, makasinati usab ang Sugbo og pipila ka mga adlaw o semana nga huwaw tungod sa gitawag nga 'monsoon break'.
“Not necessarily na everyday uwan. Naay monsoon break which is makasinati ta gihapon na fair weather,” matod niya.
Opisyal na nga gideklarar sa Pagasa ang onset sa panahon sa ting-uwan niadtong Biyernes, Hunyo 4, 2021, nga nakompirmar pinaagi sa paglabay sa Tropical Storm Dante ug sa gitawag nga 'widespread rainfall amount' nga na-monitor sa Pagasa sulod sa lima ka adlaw sa wala pa kini magdeklarar og ting-uwan.
Matod usab sa Pagasa, taas ang posibilidad nga maabot kon di gani molapas pa sa normal nga rainfall amount ang masinati karong Hunyo hangtod sa Hulyo.
Matod ni Eclarino, ang average normal rainfall amount sa Hunyo dinhi sa Cebu moabot sa 190.4 millimeters (mm), diin kada usa ka mm sa uwan mo-equivalent sa 5,000 ka mga barrel sa uwan matag usa ka kilometro kwadrado.
Apan tungod sa milabayng bagyong Dante, nga nakadala og 102.7 mm nga uwan sa Cebu niadtong Hunyo 1 (8 a.m.) ngadto sa Hunyo 2 (8 a.m.), nagkanayon si Eclarino nga posibleng molapas pa sa normal ang rainfall amount nga matala karong buwana.
Ang awtoridad nipasidaan ug miawhag sa pagpangandam sa katalagman. (WBS)