Bag-o lang ko nakasulat kabahin sa mga giingong abusadong bombero nga ningkiha hinuon og arson sa tag-iya sa trak nga nasunog diha sa Liloan. Nakalitan ko dihang nakabasa sa tuyo ni Sen. Bato dela Rosa nga hatagan og armas kining mga sakop sa kabomberohan.
Matod pa sa senador, ang mga bombero kuno wa kahadloki. Kon naa silay armas, wa nay mga buang nga motinunto nila.
Apan lahi man ang taho nga akong nadawat sa nahitabo sa Liloan. Ang nasunogan man ang gitinuntohan.
In fairness, nanawag ang usa ka bombero nga sakop sa Bureau of Fire (BFP) sa Liloan kay nisaysay sa ilang habig diha sa programang Tira Brigada ni Atty. Juril Patiño ug Jun Arellano. Lakip sa pamahayag mao ang paghimakak nga wala sila mangayo og padangog o pahalipay gikan sa nasunogan.
Gusto unta ko makabasa sa ilang investigation report kabahin sa sunog sa maong trak kay, matod pa, wala sila mohatag og kopya sa tag-iya niini.
Dili man sekreto kining resulta sa imbestigasyon sa usa ka sunog. Kon gusto ang kabomberohan sa Liloan nga moguwa ang tinuod sa maong isyu, mahimo ra mang ipahatod nila sa opisina sa Superbalita ang kopya.
O mas sayon para kanila mao ang pag-email sa kopya sa anol_cebu@yahoo.com. Atong hisgutan dayon kini karong umaabot nga Dominggo.
Hinuon, ako sab nga gihangyo ang tag-iya nga padad-an kog kopya sa reklamo nga gisang-at sa kabomberohan diha sa fiscal’s office. Nag-atang sab ko og kopya unya sa kiha nga isang-at sa tag-iya.
Samtang nagpadayon kining maong kaso, makaingon ko nga angayan gyud tukion ni Sen. Bato dela Rosa ang iyang tinguha nga hatagan og armas ang kabomberohan. Kay unsa man say depensa unya sa mga masunogan batok sa mga hanggaw nga bombero. Wa ko moingon nga ang tanang bombero hanggaw. Apan kon naa, unsa may depensa sa mabiktimang nasunogan?