USA ka trabante sa pantalan ang nasikop sa hiniusang puwersa sa awtoridad nga gipangunahan sa Philippine Drugs Enforcement Agency (PDAE) Davao, Regional Special Enforcement Team (RSET) ug Seaport Interdiction Unit North Office sa Philippine Drug Enforcement Agency Regional Office XI.
Ang buy-bust operation batok sa gikonsiderang No. 3 sa siyudad sa Davao naa sa target list sa PDEA natigayon niadtong Sabado alas 9:30 sa gabii didto sa Barangay 20-B, Poblacion, Davao City.
Giila sa PDEA-Davao ang suspek nga si Kamsa Kasim Ahamadul, 32-anyos, rigger sa usa ka pantalan ning siyudad ug nagpuyo sa Purok 9-B, Lower Madapo Hills, Barangay 8-A, Poblacion, Davao City.
Nakuha sa posisyon sa dinakpan ang usa ka gramo sa gituohang shabu nga dunay street value nga P7,000 human positibong gitunol sa suspek ang usa ka pakite bugti sa kuwarta sa poseur buyer.
Nakuha sab ang laing walo pa ka pakite sa gituohang shabu nga dunay gibug-atong nga unom ka gramos nga dunay street value nga P90,000.
Kalapasan sa Section 5 (Sale of Dangerous Drugs) ug Section 11 (Possession of Dangerous Drugs), sa Article II sa Republic Act 9165 kun Comprehensive Dangerous Drugs Act of 2002 ang atubangon nga kaso sa dinakpan didto sa korte. (Jeepy P. Compio)