Intl. flights gitipas og balik sa NAIA
Nahibalik lang og pipila ka mga adlaw ang mga international flight sa Mactan Cebu International Airport (MCIA), duna na say kamandoan ang Malacañang sa paglugway sa flights diversion.
Bisan kon gipetsahan og Hunyo 5, 2021 ang memorandum gikan ni Executive Secretary Salvador Medialdea alang sa “diversion extension” sa international flights padung sa MCIA ngadto sa Ninoy Aquino International Airport (Naia), gibutyag lang kini usa ka adlaw human nipahibawo si Gobernador Gwendolyn Garcia nga ang tumanon sa tugpahanan mao ang ordinansa sa Lalawigan alang sa swabbing sa mga overseas Filipino workers (OFW) ug returning overseas Filipinos (ROF).
Kini dunay kalainanan sa direktiba sa Inter-Agency Task Force for the Management of Emerging Infectious Diseases (IATF).
Ang unang memorandum ni Medialdea nagpatipas sa international flights gikan sa MCIA ngadto sa Naia gikan sa Mayo 29 ngadto sa Hunyo 5. Sa mao nga petsa, way memo nga nadawat ang hingtungdang mga buhatan alang sa paglugway.
Busa, sa Dominggo, Hunyo 6, nibalik pagtugpa ang international flights gikan sa Doha, Qatar ug Singapore.
Sa ikaduhang memorandum ni Medialdea alang sa extension, gitumbok niini ang pagpasunod sa tugpahanan sa protocol sa IATF.
“To ensure that, upon resumption of international flights to the Mactan Cebu International Airport (MCIA), the travel and testing protocols approved by the Inter-Agency Task Force for the Management of Emerging Infectious Diseases (IATF) will be fully and seamlessly implemented, this Office hereby extends the diversion of international flights bound for MCIA to the Ninoy Aquino International Airport, until 2359 of June 12, 2021,” matod sa kamandoan.
Si Presidential Spokesperson Harry Roque nipahibawo usab niini sa Martes, Hunyo 8, 2021.
Ilang gilauman nga human niini, mosunod ang MCIA sa guidelines sa IATF sa mangabot nga OFW ug ROF.
“Inaasahan po natin na on the 13th of June, the IATF protocols on arriving OFWs and ROFs will be implemented in Cebu,” matod ni Roque.
Ang pagpagawas sa memorandum ug pagpahibawo sa Malacañang nahitabo human sa tigom tali nila ni Garcia, mga opisyal sa mga ahensya sa kagamhanan, apil na ang MCIA sa Hunyo 7, 2021.
Atol sa tigom, klaro nga ang memorandum ni Medialdea wa pa moabot sa tugpahanan kay bisan mismo si Andrew Harrison, GMCAC chief executive adviser, nipahibaw nga gibalik na ang international flights sa Sugbo hinungdan nga mahimo na nga makadiretso ang mga Sugboanon subay gihapon sa swab-upon arrival policy sa Probinsya sa Sugbo.
Si Garcia namahayag atol sa press conference human sa tigom, nga ang tumanon sa MCIA mao ang ordinansa sa Lalawigan kay maoy “recognized law of the land.”
“Unless it is otherwise declared ultra vires by a proper court. So, they all agreed that they would have to follow the Provincial Board ordinance because they do not want to break the law or violate the law,” nagkanayon si Garcia sa Hunyo 7, 2021 nga press conference.
Sa ordinansa sa Lalawigan nga gipalabang ug giaprobahan human moluwat sa iyang Executive Order (EO) 17 si Garcia, ang tanang OFW ug ROF nga motugpa sa Mactan i-swab gilayon.
Papuy-on sila sa mga accredited hotel samtang maghuwat sulod sa duha ngadto sa tulo ka mga adlaw sa resulta sa swab text.
Kon magnegatibo, papaulion gilayon sila sa ilang dapit, apan sa ikapitong adlaw subli nga i-swab.
Samtang sa IATF directive, ang mga OFW ug ROF di I-swab, diretso silang I-quarantine ug sa ikapito ka adlaw, diha pa sila I-swab test.