KIDAPAWAN CITY -- Duha ka agila ang naluwas sa mga molupyo sa managlahing lungsod sa probinsiya sa North Cotabato adlaw'ng Lunes, Hunyo 7.
Una nang naluwas ang usa ka agila nga naluya na kaayo ang lawas nga daw dunay sakit sa Barangay Amabel, Magpet.
Asoy sa mga kabataan nga ilang nakit-an ang agila sa sagingan nga bahin sa lugar nga daw dili na makalupad ug luya hinungdan nga ila kining gipunit.
Sa diha nga nakit-an sa mga ginikanan ang dala nga agila sa mga kabataan, ila dayon kining gitunol ngadto sa mga opisyal sa barangay.
Samtang ang ikaduhang agila, ang nakaplagan didto sa Barangay Tawan-Tawan, M'lang.
Giingong bata (eaglet) pa ang langgam ug bag-o lang nagtuon sa paglupad kon diin naluwas sab kini sa mga kabataan sa maong lugar.
Daling gitunol ni Barangay Kagawad Julie Bernadas ang agila ngadto sa buhatan sa Municipal Disaster Risk Reduction and Management.
Mga opisyal sa probinsiya nanawagan karon ngadto sa mga molupyo nga kung makakita og agila, ilabi na gyud sa tiilan sa Mt. Apo nga dili pintikon o kaha pusilon, inay ampingan kini og itunol ngadto sa mga awtoridad gumikan kay "endangered species" na ang sama nilang mga langgam dinhi sa nasud. (Edgar E. Fuerzas)