MOKABAT sa P13.6 milyon nga kantidad sa gituohang shabu ang nakumpiska sa Special Operation Group (SOG) sa Davao City Police Office (DCPO) gikan sa usa ka lalaki nga gikan sa Marawi City.
Subay sa report gikan sa DCPO, usa ka Jabber Saranggani, 24 anyos, taga Panabo City, kinsa dala niini ang sinako nga gituohang shabu padung unta sa Davao del Norte.
Alas 7 sa gabii, Hunyo 7, 2021 didto sa Maharlika Highway, Barangay Lasang, Bunawan District, Davao City gikasa ang buy-bust operation nga miresulta sa pagkasikop sa suspek.
Giingon nga dunay koneksiyon ang suspek sa pagtagtag sa maong shabu nga usa ka kanhi priso.
Sumala sa kapulisan nga sulod sa duha ka semana nila gipanid-an ang lihok sa suspek hangtud miabot sa punto nga nakig-transak kini sa nagtakuban nga kapulisan.
Gikasohan na didto sa korte ang suspek kagahapong adlawa. (Jeepy P. Compio)