Grabeng binukbokay ang gilaumang masaksihan sa labing unang promosyon nga pasiugdahan sa bag-ong natukod nga ARQ Boxing Promotion nga giulohan og “Engkuwentro Uno.”
Ang promosyon, nga ipaagi og bubble set-up, gikatakda sa Hunyo 19, 2021 sa Gate 2 sa Cosonsa Manufacturing Compound sa Barangay Ibabao, Dakbayan sa Mandaue.
Sa opisyal nga paglusad sa promosyon kagahapon, Hunyo 8, 2021, sa Vienna Kaffehaus sa Bonifacio District, Brgy. Kasambagan, Dakbayan sa Sugbo, gipasabot ni ARQ stable conditioning coach Roger Potot nga gumikan sa gisagubang nga pandemya sa kalibutan nga hatod sa Covid-19, nagpanikad og maayo ang ilang mga boksidor tungod sa taas nga panahon nga wala kini makaaway.
“Hungry kaayo nga moaway ang atong boxers kay dugay man wa nakaaway tungod aning pandemic,” matod ni Potot.
“Aggressive gyud ni mangaway ang atong boxers.”
Ang sports director sa ARQ nga si Chelito Caro miklaro nga bisan wala pa’y nakaeskedyul nga away, hugot na nga nagbansaybansay ang ilang mga boksidor pinaagi sa bubble training.
“Dugay na ni silang nag-training. Pag-start pa lang sa planning last year, sige na sila og training maong sakto gyud ni sila sa kondisyon,” pasabot ni Caro.
Sa main event sa promosyon, ang pambatong boksidor sa ARQ nga si April Jay “Astroboy” Abne makigbatok kang Royder Lloyd Borbon.
Gilauman sa ARQ nga makakulit og dakong pangalan sa ugma damlag si Abne, kinsa adunay 5-0, 2KOs nga rekord.
Ang igsoon ni April Jay nga si Ian Abne ug ubang mga sakop sa ARQ stable nga sila si Berland Robles, Zandro Librador, John Paul Gabunillas, Yerrodge Gura, Arniel Canete, ug Rodex Pala mopakita sab og aksiyon sa promosyon batok sa lainlaing kontra.
Sa laing bahin, gipasabot ni Caro nga ang magtiayong tag-iya sa ARQ Boxing Promotion nga sila si Jason ug Eva Mari Arquisola nagplano nang daan nga motukod og boxing stable sa wala pa nanghasol ang Covid-19 sa miaging tuig.
Sa pagkuyanap sa Covid-19, asoy ni Caro nga mas nangusog ang magtiayong Arquisola nga motukod og boxing stable aron makatabang sa batan-ong mga boksidor nga nangandoy nga makalingkawas sa kalisod pinaagi sa boksing.
“Long term program na gyud ni,” pagtataw ni Caro. (ESL)