MAAYONG adlaw na sab mga SuperSuki!
Tulin kaayo ang dagan sa mga adlaw, wala lang damha, nia na ta sa tunga-tunga sa bulan sa Hunyo.
Duol na lang gyud ang filing sa certificate of candidacy (CoC) sa mga kandidato. Ubay-ubay na ang mipasibaw sa ilang interes nga modagan pagka-pangulo sa umaabot nga eleksiyon sa 2022.
Mipasibaw si Senador Panfilo Lacson sa milabay nga mga adlaw sa iyang panglantaw sa kahimtang sa nasud ug nagkanayon nga dili lalim ang problema nga sagubangon sa mosunod nga Presidente sa nasud human kang Presidente Rodrigo Duterte.
Ang trillones nga utang sa gobyerno tungod sa mga proyekto sa Duterte administration, ang epekto sa Covid-19 ug ang walay trabaho nga mga Pinoy nga mga salin sa pandemya nagapaabot sa solusyon.
Angayan kuno hunahunaon sa mga naghadom nga mahimong pangulo sa nasud unsay iyang katakus sa pagpadagan sa gobyerno dili aron mahimong kabahin sa kasaysayan sa nasud nga sila nahimong pangulo.
Ang lintunganay sa iyang pamahayag, buot diay siya modagan sa mao nga posisyon kon suportahan siya ni Senador Tito Sotto nga modagan isip iyang ka-tandem pagka-vice president.
Kinsa man ang gipunting ni Lacson sa iyang mga pahayag?
Dili ikalimod nga sa natad sa politika, ang panglantaw sa usa ka kandidato sa iyang mga kaatbang, siya ray hawod! Naanad na ta sa ilang mga estilo, ang ginaingon nga "crab mentality.”
Nagkahayag na ang pagdagan ni Mayor Sara Duterte-Carpio alang sa umaabot nga presidential election, samtang naghinay-hinay na sab pagguho ang pipila ka persona nga ang uban kanila, aron lang pag-atbang tungod sa gihambin nga kasuko sa kasamtangan nga administrasyon, dili tinukmod sa tim-os nga pagbati nga moserbisyo sa katawhan.
Karon pa lang daan, ato nang makita ang posibilidad nga kahimtang sa nasud ubos sa sunod nga pangagamhanan. Magpabilin gihapon ang mga himantayon ug hinawayon sa kagamhanan inay mosuporta alang sa pagpalambo sa atong nasud tungod personal man nga interest, popularidad ang nagapatigbabaw inay nga pagserbisyo sa katawhan, ang unod sa ilang mga utok ug pitik sa ilang mga dughan.
Labaw sa tanan, mahimong bakak ang mga panagna nga nasulat sa Bibliya kay nakatala na man daan nga dili magkahiusa, dili magtapot ang yutang kolonon ug ang puthaw sumala sa nakita nga dakong hulagway sa damgo ni Haring Nabukodonosor sa Babilonya nga mabasa sa basahon ni Prophet Daniel.
Ang damgo sa hari atong mabasa sa Daniel 2, nahulagway sa magapuli-puli nga kagamhanan sa tibuok kalibutan.
Ang mga tudlo sa tiil diin nagsagol ang puthaw ug yutang kolonon, nagarepresneta sa kahimtang sa kalibutan sa ulahing mga adlaw diin dili magkahiusa ang katawhan kay ang mga naga hunahuna nga sila lig-on (puthaw) modaug-daug man sa mga mahuyang (yutang kolonon).
Ang bag-o nga katumanan niini mao ang nagakahitabo karon sa political party sa atong pangulo sa nasud nga PDP-Laban diin hinay-hinay na ang pagkabungkag sa partido tungod sa mga panglantaw sa politika diin nagapatigbabaw ang mga personal nga interest.
Sa pagsugod sa Duterte administration, hugot ang gipakita nga paghiusa sa katawhan apil ang suporta sa mga walhon apan sa wa damha, ang alyansa nabungkag, kay ang Bibliya dili man mamakak.
Makita karon nga sa tapad sa mga gihugon-hugon nga mokandidato pagka-presidente, nag-una si Mayor Sara.
Usa sa mga hinungdan nganong mayoriya (majority) sa katawhan nagapaluyo kaniya mao ang mga proyekto nga biyaan ni President Digong nga dili buot sa katawhan nga mahimong "White elephant" kon lahi na ang magpadagan sa panggobyerno sunod nga administrasyon.
Dako ang atong utang tungod sa mga proyekto nga atong makita sa nagkadaiyang mga dapit sa tibuok nasud bisan pa nga gikusokuso sa mga problema ang gobyerno.
Gitakda naman daan nga dili na makab-ot ang hingpit nga kalinaw ug panaghiusa sa katawhan sa tibuok kalibutan, gikinahanglan gihapon nato ang pagsuporta ug pagrespeto sa kagamhanan aron dili tumang kalisud ang atong mabilin sa sunod nga henerasyon nga unta ila pa gihapon kitang ikapasigarbo inig abot sa ilang panahon.