GITAMBAGAN ni Presidente Rodrigo Duterte si Davao City Mayor Sara Duterte-Carpio nga di masayop sa pagdagan sa pagka-presidente.
"Si Inday [Sara], kinausap ko talaga kagabi, 'Do not run. Do not ever, ever commit the mistake of running for presidency'," tug-an ni Duterte niadtong Martes sa gabii, Hunyo 8, atol sa paghinabi kaniya ni Pastor Apollo C. Quiboloy nga gisibya sa SMNI Channel.
Matud sa Presidente nga personal niyang giistorya ang iyang anak human miuli sa siyudad niadtong Lunes, Hunyo 7.
Gihatagan og gibut-aton ni Duterte nga mapuno kini og mga pagsaway kon mohulip siya sa lingkuranan, ug di niya kini gustong masinati sa iyang anak.
"Wala ka talagang makuha sa... Pwera insulto na lang sa ating bayan. Wala ka talagang makuha diyan sa presidente, pagod lang," pagtataw niya.
“You do not deserve it. Anak kita, maawa ako sayo at alam ko naman hindi ka magpunta ng kalokohan. Sabihin ko sayo ngayon, huwag kang tumakbo. Sinabi ko talaga sa kanya iyon," dugang niya.
Hagbay nang di mosugot si Duterte nga ang iyang anak modagan sa pagka-presidente.
Apan si Duterte-Carpio pabiling nagpakahilom sa milabay niyang mga paghinabi bahin sa iyang mga plano sa 2022 eleksiyon.
Kini bisan pa sa pahayag bag-ohay pa lang ni Albay Representative Joey Salceda nga si Mayor Sara nagtinguha sa maong posisyon.
Miulbo sab ang mga espekulasyon sa dihang si kanhi Defense secretary ug kanhi presidential candidate Gilbert "Gibo" Teodoro nibisita sa Davao City niadtong Hunyo 3, ug nakighimamat kang Duterte-Carpio.
Ang biyahe ni Teodoro mihatag og espekulasyon nga siya ug ang mayor posibleng mag-tandem sa bugnong lugaynon.
Apan wala mihatag og komentaryo si Duterte-Carpio sa ilang paghimamat bag-ohay lang.
Sa pikas bahin, sa dihang gipangutana ni Quiboloy kon duna na ba siyay nakita nga angay nga mamahimo niyang manununod, gikanayon ni Duterte nga: "Wala, wala akong nakita na ano, deserving.”
Matud ni Duterte nga dunay mga aspirante kinsa mopadayon sa iyang legasiya kung matapos na ang iyang termino sa 2022, apan nagtuo siya nga kinahanglan nga maningkamot pa sila aron nga mahimong presidente. Apan gipili niyang nyutral una ning panahona.
Apan iyang panganlan sa publiko ang iyang pilion "when the time comes."
Di sab uyon si Duterte sa ideya nga modagan siya og vice president, bisan sa panawagan alang sa "Duterte-Duterte" tandem kon diin modagan siya isip bise presidente sa iyang anak nga si Mayor Sara.
Giklaro sa Presidente nga andam na siyang moretiro ug nagplano nga mopuyo sa Davao City, kon diin nagsilbi siya isip mayor og kapin 22 anyos.
"Uwi ako sa Davao [City], mag-retire," sulti ni Duterte.
Ang Partido Demokratiko Pilipino-Lakas ng Bayan (PDP-Laban), ang partido sa Presidente, mipasar og resolusyon niadtong Mayo 31, nag-awhag sa 76 anyos nga Presidente nga modagan sa pagka-bise presidente.
"Mahirap yan Pastor kasi mag-retire na ako and this time, ako ang mamili ng presidente, tapos 'pag manalo sabihin nila, ano lang yan, perpetuate yourself in power. So nagreresist ako," pagklaro ni Duterte.