Ipahigayun karong Hunyo 12, Independence Day, ang lima ka adlaw nga “Paddle Forward Cebu” usa ka 200 kilometer long distance paddling expedition nga gipahigayun sa Philippine Outrigger Canoe Club (POCC).
Mao kini ang gibutyag sa POCC sa gipahigayun nga press conference kagahapon, Hunyo 9 sa Diamond Suites and Residences sa Dakbayan sa Sugbo.
Gamit ang 6-man outrigger canoe (OC6) nga naa lang sa Cebu makit-an, 13 ka mga Filipino Paddlers ang mosalmot sa 5 ka adlaw nga paddling expedition sa Hunyo 12-16.
Ang expedition sugdan diha sa may Il Corso sa South Road Properties ug adto motapos sa Lungsod sa Moalboal.
Matod ni Buzzy Budlong, pangulo sa POCC, nga tumong niining aktibidad mao ang pag-promote sa paddle sports sa nasod ug pagsuporta usab sa “Balik Turismo” nga programa sa gobyerno.
“Paddling is in our blood as islanders. We have been planning this event since last year during the pandemic time with the intent of helping the tourism to bounce back here in Cebu,” matod ni Budlong.
“This event is to promote the paddle sports, sustainable tourism and support “Balik Turismo” initiative of the government without environment impact,” dugang pa niya.
Una nang nakigkita si Budlong uban ang iyang mga miyembro kang Gobernador Gwendolyn Garcia ug mga opisyales sa Lungsod sa Moalboal gipanguluhan sa ilang mayor nga si Paz Rozgoni aron mangayo og pagtugot sa paghimo sa maong aktibidad.
Giaprobahan usab kini sa mga opisyales sa kondisyon nga mosunod sa pagkuha sa mga permit nga mosiguro sa seguridad sa mga protected areas sa maong dapit.
Si Budlong mao ang nagkupot karon sa record nga nag inusarang Pilipino nga nituyok sa tibuok 3,025 kilometros sa Pilipinas pinaagi sa pagbugsay gikan sa Sarangani sa Mindanao hangtod sa Pagudpod sa Luzon sulod sa 88 ka adlaw. (JDS)