Grupo sa budol-budol gang ang gipanid-an karon sa Cebu City Police Office (CCPO) human niigo sa usa ka 29 anyos nga babaye.
Si Charisse Pelicano Delos Reyes, 29, taga Siyudad sa Mandaue, naghilak nga nagpatabang sa Parian Police Station human siya mabiktima sa gang niadtong buntag sa Hunyo 8, 2021 sa dalan Junquera, Siyudad sa Sugbo.
Sigun ni Delos Reyes nga samtang naglakaw siya sa maong dalan, kalit lang siya nga giduol sa usa ka babaye nga iyang gihulagway nga nagpangidaron og 40 ngadto sa 50 anyos.
Giingong nagpaila kini nga negosyante og pasayan apan na-stranded ang ilang sakyanan.
Nagpatabang ang babaye tungod kay nagkuwang ang iyang dala nga kuwarta nga gisulod sa bag.
Nanghuwam kini og kuwarta ug nibalibad si Delos Reyes nga wala siyay dala nga kwarta.
Apan samtang nagpadayon ang ilang panag-istorya, dunay laing babaye ang niduol kanila ug nisagbat nga nakaila siya sa maong negosyante ug nisuporta nga tinuod ang pangangkon niini nga nagkuwang ang puhonan.
Dinhi na nipasalig ang usa sa mga gituohang sakop sa gang nga iyang ibilin ang bag nga dunay daghang kuwarta, apan huwamon niini ang iyang alahas ug cellular phone lakip ang sud sa iyang pitaka.
Nagtuo si Delos Reyes nga tinuod ang pamahayag sa duha hinungdan nga iyang gihatag ang iyang mga alahas sama sa ariyos, kwentas ug cellphone nga mobalor sa P13,000 lakip na ang iyang pitaka nga adunay sulod nga P1,000 dungan sa pasalig nga mobalik kini aron kuhaon ang bag nga dunay sulod nga daghang kwarta apan milanat nalang ang pila ka oras wala na siya balika.
Gisusi ni Delos Reyes ang sulod sa bag apan dako na lang ang iyang kakurat nga pulos ginunting nga papel nga gi luntod nga sama og kwarta.
Matod ni Police Lieutenant Colonel Wilbert Parilla, deputy city director for operation sa CCPO, nga dili na kini bag-o nga insidente sanglit daghan na ang nabiktima sa budol-budol nga gituohang sakop sa usa ka organisadong grupo.
Gimandoan karon ni Parilla ang mga imbestigador nga makig-alayon sa MandaueCity Police Office (MCPO) ug sa kapulisan sa Siyudad sa Lapu-lapu sanglit aduna say nabiktima sa maong duha ka dakbayan.
Usa sa ilang subayon kung ang nangiyo sa Lapu-lapu ug Mandaue mao ra ba usab ang nakabiktima sa usa ka babaye sa dalan Junquera.
“Base sa account sa biktima, the same ra gihapon nga personality so mao ni ang atong gi coordinate ron especially nga kini nga mga suspect nato reported sad ni sa Mandaue and Lapu-Lapu,” matod ni Parilla.
Awhag sa kapulisan sa publiko nga dili dayon motuo sa mga tawo nga moduol wala nila mailhi nga mopakita og daghang kwarta tungod kay usa kini ka pagpangilad.
Kung makasugat sila niini mahimong motawag dayon sa pulis nga naa nadestino sa dapit o ba kaha motawag sa police station aron ila kining mahatagan og aksyon. (AYB)