Garcia, PB di molugak sa protocol

Gobernador Gwendolyn Garcia ug Provincial Board. (Photo by Alex Badayos)
Gobernador Gwendolyn Garcia ug Provincial Board. (Photo by Alex Badayos)

Dili molugak ug di molunga sila si Gobernador Gwendolyn Garcia ug Provincial Board (PB) bisan kon gilugwayan sa Malacañang ang pagpatipas sa international flights padung sa Mactan Cebu International Airport (MCIA) ngadto sa Ninoy Aquino International Airport (Naia).

Gani, mopahigayon ang PB og usa ka special session sa Biyernes, Hunyo 11, 2021, aron palig-unon pa ang Provincial Ordinancea 2021-04 nga nagpaluyo sa Executive Order (EO) No. 17 ni Garcia nga naglatid sa mga lagda alang sa mopauli nga mga overseas Filipino worker (OFWs) ug returning overseas Filipinos (ROFs) sa Sugbo.

Kini maoy gikompirmar ni PB Member Red Duterte sa ikalimang distrito sa Sugbo sa Hunyo 9, 2021.

Si Duterte nagtuo nga sakto ang gihimong lagda sa Kapitolyo kay maghatag kini og kasayon alang sa mga Sugboanon nga mopauli.

“We believe nga ang among gipasar nga ordinansa is doing wonders and is very effective dinhi sa Probinsya sa Sugbo. And we do not see any reason ngano mo-adhere mi sa katong gipang-adhere sa uban. It is what we always bear in our minds bitaw nga whatever works for Cebu, we will stand by it,” matod ni Duterte sa Hunyo 9.

Subay sa lagda sa Lalawigan, ang tanang OFW ug ROF nga motugpa sa Mactan i-swab gilayon.

Papuy-on sila sa accredited hotels samtang maghuwat sulod sa duha ngadto sa tulo ka adlaw sa resulta sa swab test. Kon magnegatibo, papaulion gilayon sila sa ilang dapit, apan sa ikapitong adlaw, subli nga i-swab.

Nagtuo si Duterte nga sa maong paagi mas sayon ug mas epektibo nga masakpan dayon ang mga mopauli nga natakdan na sa coronavirus disease (Covid-19).

Samtang si PB Member John Ismael Borgonia sa tersero distrito, nagtuo nga kon dunay na-violate nga lagda ang Probinsya dugay na unta nga nipasaka og kaso ang Inter Agency Task Force (IATF) ug gideklarar nga ultra vires ang ordinansa.

“Kon naa tay na violate nga base sa ilang palisiya sa IATF, well, I file na unta sila. So, gi-declared ultra vires na unta na ang atong ordinance and of course kami ta administratively, liable mi if they believe nga sayop ang among gibuhat. Ang ilang gibuhat nuon ilang gisakripisyo ang mga Sugboanon pinaagi nga didto gipalanding sa Manila (ang flights). Kami unta ilang ig-on dili ang mga Sugboanon,” matod ni Borgonia.

Hangyo ni Borgonia sa IATF nga dili amungon o isakripisyo ang mga Sugboanon tungod lang sa kamandoan nga gusto niining matuman.

“Ayaw ninyo i-sakripisyo kay gusto ninyong kamo lang ang matuman nga i-bully nalang nila nato ang wa nila pag respetar sa local autonomy...So naa man silay legal remedies unta without sacrificing sa mga Sugboanon nga manguliay, so why don’t they do that? Sa national government,” dugang ni Borgonia.

Samtang si Presidential Spokesperson Harry Roque niseguro nga way kasong ipasaka batok kang Garcia ug sa PB.

“There is no truth to reports that I would be planning to take legal action against Cebu Governor Gwendolyn Garcia over certain decisions made in relation to the provincial government’s COVID-19 response. This is not within my scope of duties and responsibilities as Presidential Spokesperson and Inter-Agency Task Force (IATF) Spokesperson,” nagkanayon si Roque.

Nakigsulti na siya kang Interior Secretary Eduardo Año niini ug dunay panagtagbo nga ilang ipahigayon.

“Secretary Año clarified that there could be a possible discussion as regards this matter with the good Governor and that there is no filing of case is in the offing,” dugang ni Roque.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph