MI-TOTAL na sa 6,566 ka mga violators sa mga health protocols ubos sa pagpatuman sa modified enhanced community quarantine (MECQ) sa Davao City, subay sa datus sa Davao City Police Office (DCPO).
Sumala ni DCPO spokesperson Police Captain Rosario Aguilar nga bunga kini sa ilang istrikto nga pagpatuman sa mga angay sundon sa katawhang Dabawenyo atol sa MECQ.
"Even before sa mga quarantine checkpoints nato ug bisan sa palibot atol sa pagsubay sa atong mga foot patrollers, istrikto na gayod nato nga gipatuman ang mga angay himuon, gipahimangnoan ang mga malapason ug gipahamtangan sila og silot subay sa kung unsa ang naa sa atong mga executive orders nga gipagawas sa City Hall," ingon ni Aguilar.
Sa datus sa DCPO, ang pinakadaghan sa ihap nga malapason mao ang wala pagsuot og face shields nga dunay ihap nga 2,295 gikan sa Hunyo 5, 2021 padung Hunyo 8.
Gisundan kini sa wala pagsuot og face mask nga dunay ihap nga 1,916 ka malapason, samtang misunod ang paglapas sa social distancing ug ang mass gathering nga dunay malapason nga 1,252; gisundan kini sa curfew nga dunay ihap nga 749; dayon ang wala paggamit og barrier sa motorsiklo 275; misunod ang non-essentials nga dunay 107 ug tulo ang natala nga malapason sa liquor ban.
Nanganti ang DCPO nga ilang pa gayod istriktuhon ang pagpatuman sa balaod diha sa tumong ug tinguha nga mokunhod ang kaso sa Covid-19 sa Davao City. (Jeepy P. Compio)