SUBLING nagpahimangno ang Davao City Health Office (CHO) nga mga "walk-ins" sa mga lugar nga nagbakuna istriktong gidili.
Sa pahayag nga gi-post sa Davao City government Facebook page, ang siyudad wala magdawat og walk-ins sa mga vaccination sites ilabi na nga ang dakbayan kasamtangang nakasinati og pagsutoy sa mga kaso sa Covid-19.
"Ang pagpundo ug pagtapok sa mga vaccination site posibleng makadugang sa risgo nga matakdan sa sakit," matud pa sa lokal nga panggamhanan sa pahayag nga gi-post niadtong Miyerkules, Hunyo 9.
Kinahanglan nga mokontak sa ilang tagsa-tagsa ka mga buhatan sa district health ang mga magpabakuna alang sa ilang schedule.
Subli kining gihisgutan ni CHO Acting Head Dr. Ashley Lopez sa paghinabi kaniya sa 87.5 FM Davao City Disaster Radio, buntag niadtong Miyerkules, Hunyo 9, 2021.
Matud ni Lopez nga ila kining istriktong napatuman atol sa pagbakuna sa Priority A1 group o ang medical frontliners.
"Pag-abot sa [Priority] A2 [senior citizen] man gud, lisod man gud ning atong mga senior citizens. They were too anxious to receive their vaccines. Na-excited na sila. Ang uban di na gyud kahulat og notice sa text message," tataw pa niya.
Gikanayon sa opisyal nga mga magpabakuna kinahanglan nga morehistro sa ilang pinakaduol nga district health centers, o pinaagi sa online agi sa SafeDavao QR (DQR) Code.
Sumala sa pipila ka mga indibiduwal kinsa mibisita sa ilang mga health centers, way doktor nga modawat sa ilang registration. Samtang ang ubang indibiduwal wala kahibawo kon unsaon pagrehistro sa online.
Kini maoy hinungdan nga ang uban mo-walk-in na lang aron nga mabakunahan.
Apan giklaro niya nga di na nila kini mahimo sa laing mga grupo.
Dugang pa niya nga di na kinahanglan nga i-regulate ang ihap sa mga magpabakuna sa vaccination hubs aron nga mapatuman ang minimum health protocols.
Target nila karon ang pagbakuna sa 1.2 milyon nga Dabawenyos una ang Nobyembre karong tuiga. Apan ang vaccination rollout molungtad pa og usa o duha ka tuig.
Nagpunting sab ang siyudad nga moabli og 25 ka vaccination hubs aron paspasan ang pagbakuna.
Sa pikas bahin, usa ka Roland, pangan gipugngan, dunay comorbidity, apil niadtong nilinya sayo pa sa ala 6 sa buntag aron nga makakuha sa iyang unang dose sa Sinovac sa SM Ecoland.
Matud niya, taas na ang linya gawas sa mall.
Sa dihang miabot na ang mga bangko ug gisugdan na og apud-apod ug ang mga magbakuna miabot na, matud ni Roland, ang linya wala na mahapsay.
"Wala ko kasabot sa ilahang sistema. Very disorganized. Wala na nasunod ang linya, naa pa gasingit. Kung naa lang ka didtoa, makita nimo grabe ang away sa linya. Nagsinagitay na. Gasingit man gud ning uban. Alkanse kaayo sa uban nga sayo kaayo nipila,” saysay niya.
Si Roland nagsulti nga lisud alang sa iyang bahin, tungod kay duna siyay comorbidity. Apan mipili siyang mag-antus nga molaray sa taas nga linya aron lang nga mabakunahan.