Alang niadtong gusto nga malayo sa kasamok sa siyudad ug nagtinguha nga mapaduol sa kinaiyahan, lakip niadtong buot matagamtaman ang kalinaw sa kaugalingon nga dili ra layo sa dakbayan.
Ania ang EVO Nature Camp, suroyanan nga nahimutang sa Balamban, Lalawigan sa Sugbo.
Ang maong nature camp adunay gilapdon nga 4.5 ka ektaryang luna nga puno sa nagkadaiyang matang sa mga tanum ug haom niadtong mahiligon sa camping.
Dili rason ang way budget kay P75 ray bayad.
Dili kabayran ang makabibihag nga talan-awon nga maka-abag sa pagpatin-aw sa imong huna-huna gumikan sa panganod nga naglibot sa mga bungtod dunganan sa bugnaw nga paghuros sa hangin.
Picture perfect ang dapit diin imong makita ang pagsawop sa adlaw o sunset tungod kay anaa kini sa kasadpang bahin sa Sugbo.
Makita usab nimo ang Bulkang Kanlaon sa isla sa Negros kon tin-aw ang wanang.
MAHIMONG BUHATON
Mahimong mag-trek sa maong dapit ug tungod kay nahimutang ang Balamban sa tunga-tungang bahin sa lalawigan sa Sugbo, adunay area nga gitawag og “Ground Zero” nga anaa nasakop sa EVO.
Sa EVO usab inyong masuwayan ang nature hiking ug trekking sama sa mga busay, langub, pormasyon sa bato, tanaman, ug umahan.
Ang EVO Nature Camp nagtanyag og “Glamorous Camping (Glamping)” nga gilusad niadtong Septiyembre 2020.
Sa wa masayod ang glamping usa pa ka matang sa camping diin ang puy-anan ug mga pasilidad mas luho itandi sa naandang camping.
Ang mga Glamping tent susama og hotel ang accommodation lakip na ang ilang gamit.
Ang EVO Nature Camp adunay grill house nga nagtanyag og lamiang pagkaon, mga makabusog ug makahupay sa uhaw. Kinahanglan nimo nga sulayan ang ilang homemade nga kakanin.
Pipila sa mahimong i-order ang barbeque, budbud, bibingka ug mga cold drinks; cucumber shake, guyabano shake, mango shake ug uban pa.
UNSAON PAG-ADTO?
Ang EVO nahimutang sa Barangay Gaas, Balamban, Cebu gibana-bana nga molanat og usa ka oras ang biyahe gikan sa JY Square Mall o Marco Polo subay sa Transcentral Highway.
Sa kadtong way pribadong kasakyan adunay V-hire nga manukad Ayala Central Bloc Terminal, adunay rota nga mobiyahe paingon Balamban nga gibana-bana nga ang pletehan mokabat sa P120 (one way).
Matultolan ra sab ang lugar gamit ang Waze o Google Maps sa kadtong adunay mga sakyanan. Ang EVO bukas gikan sa 7:00 a.m. ngadto na sa 8:00 p.m. matag adlaw. /
Camping:
Sa adunay tulda – P300 each
Pa-abang og tulda – P300 (good for 2), P500 (4 pax), P700 (6 pax) lakip na ang inflatable bed.
Alang sa mga walay tulda o tent mamahimong mo-abang
CONTRIBUTOR:
Jesson J. Morata - lumad nga taga-dakbayan sa Lapu-Lapu, Marketing and Communications Specialist sa Visayas ug Mindanao sa usa sa mga BPO’s dinhi sa Sugbo ug mahiligon sa biking, motorcycle rides, trekking, running ug certified nga hinuroy.