Ipadayon sa kagamhanan sa lalawigan sa Sugbo ang swab-on-arrival policy alang sa mopauli nga mga overseas Filipino workers (OFWs) ug ubang returning overseas Filipinos (ROFs) ubos sa usa ka executive order ug ordinansa. Palig-unon pa gani kini sa Cebu Provincial Board.
Apan kay wa makauyon niini ang kagamhanang nasyonal, labi na ang Inter-Agency Task Force for the Management of Emerging Infectious Diseases (IATF-MEID), gipadayon sab ang pagpalikay sa mga international flights padung sa Mactan Cebu International Airport ngadto sa Manila hangtod sa Hunyo 12, Independence Day.
Pulos maayo ang mga tumong. Si Cebu Gov. Gwen Garcia gusto nga malikay sa kahasol ug dugang galastohan sa mga quarantine hotels ang mga mopauli nga mga OFWs ug mga ROFs. Ang IATF gusto nga malikayan ang pagkatap sa Covid-19.
* * *
Suportado si Governor Gwen sa mga mayor sa kalungsoran ug mga syudad sa lalawigan sa Sugbo. Si Senate President Vicente Sotto III ug walo ka mga kongresista nipaluyo sa maong policy. Bisan ang Integrated Bar of the Philippines Cebu Chapter (IBP-Cebu) niawhag sa gobyerno nasyonal nga sagupon ang arrival protocol sa gobernador.
Duha ka mga senador, si Senador Sonny Angara, usa ka abogado, ug si Senador Ramon “Bong” Revilla Jr., usa ka sikat nga artista nga maayong mosayaw og buduts, nipaluyo sa swab-on-arrival policy sa probinsiya sa Sugbo.
Alang kang Angara, ang testing policy sa probinsiya “practical and makes perfect sense” ug iyang giawhag ang IATF nga tun-an kini kon mahimo bang sagupon o isukip sa Covid-19 testing protocol alang sa mga pasahero gikan sa laing nasod.
* * *
Alang sa gobernador, dugang gasto ang 14 ka adlaw nga pagpuyo sa usa ka quarantine hotel alang sa OFWs ug ROFs nga nipauli tungod sa wa hilantawi nga hinungdan sama niadtong namatyan og kabanay.
Mao na nga inig-abot, i-swab dayon sa di pa mopuyo sa quarantine hotel. Kon negatibo ang resulta, papaulion ug adto na tiwason ang 14 ka adlaw nga quarantine sa ilang balay. Apan aron maseguro, i-swab pag-usab sa ikapitong adlaw gikan sa pag-abot.
Ang rikisito sa IATF nga 14 ka adlaw nga pagpuyo sa quarantine hotel alang sa tanang moabot sa Pilipinas nga gikan sa laing nasod. Wa tagda kon nabakunahan na o wa. Matod pa ni Senate President Sotto, unsay kapuslanan sa pagpabakuna?