Ang filing sa certificate of candidacy (COC) alang sa Mayo 9, 2022 national ug local elections himuon karong Oktubre 1–8. Bisan sa kalayo pa sa maong petsa, nibukal na ang kaldero sa pulitika.
Ang nadungog kaayo mao ang resolusyon sa Partido Demokratiko Pilipino–Lakas ng Bayan (PDP-Laban) nga naghangyo kang Presidente Rodrigo Duterte paglansar pagka-bise presidente sa sunod tuig nga piniliay. Siya usab ang gipabuot kon si kinsa ang iyang padaganon pagka-presidente. Sunod niini, iyang ginganlan nga usa kanila ni kanhi senador Bongbong Marcos, Senador Bong Go, Senador Manny Pacquiao, ug Manila Mayor Isko Moreno nga maoy iyang ikapares. Apan daghang nagtuo nga si Sen Go maoy iyang pilion. Ilang katarungan nga kon mapili silang duha, si Duterte ra gihapon ang maglingkod sa Malacañang.
Si Sen. Pacquiao gipaabot nga mobali na og partido human niya makabangga ang mga dagkung opisyal sa PDP-Laban tungod sa gipatawag nga national council meeting sa partido nga gitawag ni Pacman nga iligal. Anaa hinuon siyay gi-produce nga pelikula nga nag-ulohan “Zeus” kalabot sa Asian hate crimes didto sa Estados Unidos. Tingalig makatabang kini sa iyang kandidatura.
Naa usab ang tandem nga Senator Ping Lacson-Senate President Tito Sotto. Wala magpanuko si Sen. Sotto sa pagpahibawo nga interesado siyang modagan pagka-bise ni Sen. Lacson. Sa survey nga gihimo sa Pulse Asia sa Pebrero 10-19, atong makita nga sa tandems nga gipresentar nag-una ang Bong Go & Rodrigo Duterte nga nakakuha og 32; gisundan sa Grace Poe & Tito Sotto 23; Bongbong Marcos & Manny Pacquiao 17; Panfilo Lacson & Isko Moreno 11; ug Leni Robredo & Francis Pangilinan 8.
Angay masayran nga ang mga anti-Duterte, labi na ang mga oligarchs nga gigukod sa Duterte administration sama ni Manny Pangilinan, Lopez sa ABS-CBN, Ayalas, Roberto Ongpin ug uban pa, nangita og kandidato nga dumadaug sa pagka-presidente. Kaniadto si Pacquiao ra ang ilang gitan-aw, apan karon nga naa na ang Lacson-Sotto tandem nakakita na sila og himuong manok.
* * *
Nahibalik lang og kadiyot ang pila ka international flights sa Mactan Cebu International Airport (MCIA), aduna na say kamanduan nga ibalik kini sa Ninoy Aquino International Airport (Naia) hangtod sa Hunyo 12. Ang tumong ug tuyo sa maong direktiba aron motuman gayud si Gob. Gwendolyn Garcia sa protocol nga buot ipatuman sa IATF sa mangabot nga overseas Filipino worker (OFW) ug returning overseas Filipino (ROF).
Mao kini problema ay mismo si Gob. Garcia dili na makausab sa ordinansa nga gipasar sa Provincial Board. Samtang magpadayon kining maong sitwasyon, dakog kahasul ang mahatag ngadto sa mga OFW ug ROF nga mopauli unta dinhi sa Visayas ug Mindanao. (mannyrabacal1144@gmail.com)