Sa interview ni Pastor Apollo Quiboloy sa iyang kaugalingong TV channel, Sunshine Media Network International (SMNI), sa miaging gabii, gibutyag ni Presidente Rodrigo Duterte nga iyang gi-discourage o gibauran ang iyang anak nga si Davao City Mayor Sara Duterte Carpio sa pagkandidato sa pagka-presidente sa sunod tuig nga eleksiyon. Matod pa ni Digong way makuha ang usa ka tawo sa maong posisyon kay bisan og mohimo ka og maayo, daghan gihapon ang mosaway nga taga oposisyon o mga tawo nga gustong modaut sama sa gihimo kaniya. Maluoy siya sa iyang anak nga labhan ug sawayon bisan kon maayo ug tinarong ang gihimo. Basin og dili makaya ni Inday Sara kay babaye.
Sa pangutana ni Quiboloy kon interesado ba siya nga magpapili sa pagka-bise presidente, matod niya nga dili na ug moretiro na siya sa pulitika. Daghan ang nag-awhag kang Inday Sara nga padaganon sa pagka-presidente. Ania ning “Duterte Pa Rin Movement” ug “Run Sara Run.” Morag nadala sa galgal si Inday Sara. Gibutyag ni Albay Congressman Joey Salceda nga modagan si Inday Sara. Wala hinuon mikonpirmar ang mayor. Aduna say taho nga silyado na ang Sara-Gibo Teodoro tandem.
Sa pagka-bise presidente ni Digong, dili pa kita mosakay o motuo sa mga pamahayag sa Presidente gumikan kay posible nga mausab pa ang iyang huna-huna. Nahibawo na ta sa style ni Digong nga usab-usab ang huna-huna. Basin og magalgal aning awhag sa iyang mga supporter nga padaganon siya. Taas pa kaayo ang panahon alang sa iyang pagdesisyon. Kon modagan siya, siguradong modaug kay popular pa siya karon. Apan unsa man ang iyang mapiling presidente dili niya ka-partido?
Pero lalisunon pa ning isyuha kay adunay mga haniti sa balaod nga nagkanayon nga disqualified ang sitting president sa pagdagan pagka-bise. Ubos sa rule of succession, siya ang mopuli kon dunay mahitabo sa Presidente. Unya disqualified naman ang Presidente nga magpasubli kay usa ra siya ka termino. Okay lang kuno kon ubos nga posisyon ang daganan sama kang Gloria Arroyo nga nagkongresista human sa iyang termino. Moabot pa ning isyuha sa Supreme Court kon dunay mosang-at og petisiyon. (bobbygnalzaro@gmail.com)