SUPERBALITA CEBU

Editoryal: Kinahanglan i-regulate

Editorial Cartoon by John Gilbert Manantan

Niadtong 2007, napasar ang Anti-Rabies Act kun RA 9482. Gitumong kini aron masanta ang pagkuyanap sa kagaw sa rabies. Niini, naa sa balaud ang mga responsibilidad sa mga tag-iya og iro aron di makapaak ug ilang mga tulubagon kon makapaak.

Apan bisan pa sa pagpasar na sa balaud, daghan gihapon ang mga iro nga wa mahipos, naa lang sa mga tugkaran sa mga balay ug nagsuroysuroy pa sa kasilinganan ug kadalanan. Kon makaapak, di pa mahibaw-an kinsa ang tag-iya.

Tinuod, dunay mga pagpamakuna sa mga iro nga gibuhat ang mga local government unit, apan kuwang kaayo sa pagpakabana sa paghipos sa mga hayop aron di na mahimong hulga sa publiko. Kay ang mga iro nga naa sa kadalanan di lang makapaak, mao say hinungdan sa mga aksidente sa dalan nga nagkutlo sa kinabuhi.

Ang kongkretong ehemplo niini mao ang kamatayon sa usa ka lalake ug babaye nga nakaligis og iro sa lungsod sa Barili sa laing adlaw ug dapit sa lungsod.

Niadtong sang Hunyo 8, 2021, naputos sa mga samad ang lawas ni Jeny Rose Gomilao, 16, human siya balikbaliki og bugno sa iro nga gikan sa balay nga naa duol sa ilang gipanginhasan sa iyang duha ka mga pag-umangkon.

Nahitabo ni bisan kon ang tag-iya sa iro naninguha nga di na masamdan pa og maayo ang dalaga. Apan kay duha ang Rottweiler, naglisod ang tag-iya sa pagpugong sa iyang mga binuhi.

Giingon nga mubo ra ang koral sa balay sa mga tag-iya hinungdan nga nakagawas ang mga iro.

Maayo kon ang mga LGU moumol og ilang kaugalingong ordinansa nga mag-regulate sa pagpamuhi sa mga iro. Apil na niini ang panginahanglan sa pagtangkal, pagbutang og higot sa mga iro ug kon mahimo, koralon ang balay nga dunay igong gihabugon aron di makagawas ang mga iro.

Kaaron man gud, ang mga LGU kutob lang sa pagpamakuna, wa gi-regulate ang pagpamuhig mga iro.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!