Usa ka construction worker angol human nakuryentihan samtang namintal sa usa ka balay sa Barangay Mabini, Lungsod sa Poro, Isla sa Comotes, Lalawigan sa Sugbo, Huwebes, Hunyo 10, alas 9:50 sa buntag.
Si Vincent Gallardo, hingkod, construction worker ug taga Tudela, nalandig sa tambalanan.
Si Police Staff Sgt. Jomar Marquez, imbestigador sa Poro Police Station nga nahinabi sa Superbalita Cebu, nagkanayon nga si Gallardo uban sa laing tulo niya ka kauban namintal sa atop sa panimalay.
Gibadlong siya sa iyang mga kauban nga dili mokumpiyansa, linya sa kuryente sa Camotes Electric Cooperative (Celco) nga naa duol sa atop.
Pero si Gallardo kumpiyansa gihapon nga mikuha og kahoy gidughit ang linya sa kuryente gusto niini nga sutaon kon live kini.
“Pagkuhit niya sa kahoy buhi ang kuryente naglagpot ang biktima gumikan sa kakusog sa boltahi,” dugang ni Marquez.
Gidali siya sa pagdala sa tambalanan sa Lungsod sa San Francisco Camotes, ug luwas na ang kahimtang. (GPL)