Naghuwat ang executive department nga aprobahan sa Cebu City Council ang P4.4 bilyones nga supplemental budget (SB) number 1 diin ang dakong pahat niiini ibayad sa nahabiling utang sa South Road Properties (SRP).
Si Mayor Edgardo Labella malaumon nga aprobahan sa City Council ang iyang gipangayo nga pundo sanglit igasto kini sa mga batakang gikinahanglan sa katawhan sama sa pagtiwas sa katukoran sa Cebu City Medical Center (CCMC).
Ang chairman sa Committee on Budget and Finance sa City Council, Konsehal Raymond Garcia, nagkanayon nga natubag sa mga department head ang mga pangutana para sa ilang gipangayo nga pundo atol sa budget hearing sa nakalabay nga semana.
Ang pagbayad sa SRP loan nagkantidad og P1.2 bilyunes nga maoy nahabiling utang sa giutang nga 6 billion Yen niadtong tuig 1995 sa pag-ugmad sa SRP.
Si Garcia nagkanayon nga apil sab didto ang P1 bilyon para sa pagtiwas sa 10 ka andana nga CCMC.
Ang P3 bilyones SB1 gikuha gikan sa P5 bilyones isip source of funds nga maoy nahabilin P16 bilyones nga halin 45 ektarya nga yuta sa SRP niadtong 2015.
Matod ni Garcia nga posibleng mahisgotan sa sunod regular session sa konseho ang pag-aprub sa SB1 sa siyudad para sa tuig 2021. (PAC)