Unom ka mga pulitiko nga naglangkob sa lima ka mga senador ug usa ka party-list representative nagsuporta sa baruganan sa kagamhanan sa lalawigan sa Sugbo labot sa mga lagda sa mga mopauli nga overseas Filipino workers (OFWs) ug returning overseas Filipinos (ROFs) sa Sugbo.
Si Senator Joel Villanueva nalakip sa mga senador nga mipadayag og suporta sa baruganan sa probinsya nga “swab-upon-arrival” nga polisiya.
Matod ni Villanueva nga “sensible, but science-based” ang pamaagi sa Probinsya tungod kay gawas nga makadaginot sa kwarta, ma-sulit usab ang oras niini sa pamilya nga maoy usa sa hinungdan sa ilang pagpauli sa nasud.
Samtang nipadangat usab sa iyang suporta si Senador Miguel “Migz” Zubiri.
Matod sa senador nga sa makita nga kausaban sa pakigbatok sa coronavirus pandemic, ilabi na nga nagpadayon na ang pagpamakuna, gikinahanglan na usab nga susihon ug usbon ang mga polisiya nga maghatag og kagaan sa publiko.
Sama sa duha ka mga senador, suportado usab ni House Deputy Speaker ug Bagong Henerasyon party-list Representative Bernadette Herrera ang maong polisiya.
Saysay ni Herrera nga “inhumane” o dili tawhanon ang pagpaubos sa mga OFWs ug ROFs sa taas nga kwarantina ilabi na nga limitado ang oras ug panahon niini sa nasud.
Laing nagsuporta sa Lalawigan sa Sugbo mao si Senador Vicente Sotto III, Edgardo Angara ug Ramon “Bong” Revilla Jr. (ANV)