SUPERBALITA CEBU

Bucks mibawos sa Nets sa Game Three

Tungod sa grabing kainit sa ilang tagtagsa ka emosyon, makita ning hulagwaya nga daw og sa mora na og naghawok si Kevin Durant (wala) sa Brooklyn Nets ug PJ Tucker (tuo) sa Milwaukee Bucks nga hait kaayong nagtinutokay atol sa Game 3 sa Eastern Conference semifinals. (AP)

Human mapukan sa unang duha ka duwa didto sa Brooklyn, ang Milwaukee Bucks nakakita og gamayng agianan aron makabawos sa Game 3 sa ilang best-of-seven Eastern semifinals batok sa Nets, 86-83, Huwebes sa gabii (Biyernes sa Pilipinas) aron pagkubsan ang series, 2-1.

Ang panagkumboya nila ni Jrue Holiday ug Khris Middleton sa naghinapos nga bahin sa duwa maoy miselyo sa ilang kulbahinam nga kadaugan atubangan sa mabagang dumadapig nga midasok sulod ug gawas nga bahin sa Fiserv Forum sa Milwaukee.

Ang spin move ni Holiday dayon layup ginamit ang walang kamot maoy naghatag kanila sa 84-83 nga labaw nga gitwas sa duha ka free throws ni Middleton.

Si Middleton mitapos sa duwa nga may 35 puntos, 15 ka rebounds ug usa ka assists sulod sa 44 minutos nga dakong kalahian sa iyang gipakita sa unang duha ka duwa diin 30 porsiyento lang ang iyang nahimo sa field goal didto sa Brooklyn.

Midugang og 33 puntos si Giannis Antetokounmpo. Si Holiday igo ra man toud nakakolekta og nuebe puntos apan ang iyang layup sa katapusang 11.4 segundos maoy nagyawe sa kadaugan.

Diha unta kahigayona nga maka overtime ang Nets apan ang tres ni Kevin Durant igo rang miuntol sa rim nga natukma usab sa pagkapupos sa oras.

Si Durant kinsa maoy mipupo sa katapusang nuebe puntos sa Brooklyn mikolekta og 30 puntos sa maong duwa.

Ang Game 4 magpabilin gihapon sa korte sa Milwaukee karong Dominggo (Lunes sa Pilipinas).

Si Kyrie Irving mitali og 22 puntos ug 16 usab ang natampo ni Bruce Brown alang sa Nets.

Sayong miarangkada ang Bucks ug dali gilayon kining nakaposte og 21 puntos nga labaw, 30-9, sa unang 10 minutos. Apan ang 22-2 nga gipahagsa sa Nets maoy nakapasikit sa duwa.

Gikan niadto wala nay nakalabaw kanila og sobra sa singko puntos samtang nagpulipuli kini og sakmit sa bintaha.

Sa third quarter, nalangay sa makadiyot ang panagsangka human nagkasungi si Durant ug si PJ Tucker nga gani nagkaabot ang ilang mga dagway inubanan sa mahait nga tinutokay.

Hinuon nauwang ra ang duha kinsa pulos gipahamtangan og technical foul. (JBM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph