Tulo ka mga durugista ang napatay ug 10 ka kilo sa gituohang shabu nasakmit sa usa ka drug bust nga nisangko sa ginukdanay ug pinusilay gikan sa Barangay Campo 4, Dakbayan sa Talisay hangtod sa Transcentral Highway sa Barangay Taptap, Dakbayan sa Sugbo sa Biyernes sa gabii, Hunyo 10, 2021.
Ang buy-bust gipangulohan sa Police Drug Enforcement Group (PDEG).
Si Police Brigadier General Remus B. Medina, pangu sa PDEG, niingon nga human matigayon ang transaction ug nakapalit ang mga pulis og duha ka mga kilo, nakabantay ang tulo ka drug pushers nga mga pulis ang gika-transact hinungdan nga nahitabo ang pinusilay.
“Nagkaroon tayo ng buy-bust operation, initially doon sa Talisay, Campo 4. Na consummate yung buy-bust and then na detect ng grupo na to na mga operatiba ang ka transaction nila kaya nagkaputokan sila dun,” asoy ni Medina sa mga tigbalita.
Nisakay gilayon ang tulo ka mga durugista sa usa ka itom nga Toyota Vios nga way plate number.
Gilusad dayon ang Oplan Dragnet operation aron mohimog checkpoint sa mga karsada nga posibling agian sa tulo ka gikatahapang mga durugista.
Dali nga nakig alayon ang PDEG sa Cebu City Police Office (CCPO), Highway Patrol Group (HPG), Criminal Investigation and Detection Group (CIDG 7) ug kapulisan sa probinsya sa Sugbo.
Ilang girumbo ang Transcentral Highway (TCH) aron didto magbutang og checkpoint.
Pasado alas 10 sa gabii, ilang nasigpatan ang itom nga awto nga nagsubay sa TCH nga tungod niini, gipaalerto na dayon ang mga operatiba nga nag-atang sa bukid.
Sa dihang nagdanga-danga na sa checkpoint, inay mohunong, giingong gipamusil ang mga pulis.
Dali usab nga ningbawos ang mga sakop sa Special Operations Unit sa PDEG ug HPG 7 nga niresulta sa kamatayon sa tulo.
Ang mga suspek giilang sila si Lihbon Kerr Bargayo, Christopher Lim ug Boyet Rama.
Nakuha gikan sa sakyanan ang laing walo ka kilo sa gituohang shabu nga gisulod sa maleta nga naka vacuum sealed sa tea bag nga dunay mga ahos sa kilid niini.
Lakip sa nakuha sa kapulisan ang usa ka Armalite rifle, usa ka kalibre. 45 nga pistola ug .38 kalibre nga revolver ug buy-bust boodle money nga mokantidad og P2.8 million.
Matod ni Medina nga kapin sa usa ka buwan nila nga gi monitor ang mga suspek.
Nakadawat silag report nga sakop ang tulo sa usa ka big time drug group nga naglihok sa Central Visayas.
“Matagal na natin silang minonitor mga 1 month na. Yung grupo ng drug group na dito sa region 7,” matod ni Medina.
Si Bargayo gitudlo nga taga Pakigne, Minglanilla sa usa ka reader sa Superbalita Cebu nga di gustong nganlan.
Gihulagway niya nga nagsulod gawas na sa bilanggoan si Bargayo.
Sila si Bargayo ug mga kauban adunay mga tattoo sa lawas nga gituohan nga ilhanan sa ilang grupo nga maoy gisusi karon sa kapulisan.
Si Philippine Drug Enforcement Agency 7 Director Levi Ortiz nga didto usab sa pagkasakmit sa drugas nagkanayon nga ang mga ahos nga naa gipataban sa mga kinilo nga shabu gituohang gituyo aron dili masakpan sa mga K9 unit sa airports.
Matod niya nga dakog epekto sa supply sa illegal nga drugas ang pagkasakmit sa maong gidaghanon sa illegal nga drugas.
“We laud the PNP for this very good accomplishment,” matod ni Ortiz. (Dugang taho ni PAC)