Gibutyag ni Lapu-Lapu City Mayor Junard Chan nga misanong na sa iyang hangyo ang kadagkuan sa Philippine Export Zone Authority (Peza) nga pa-duty-hon ang mga doktor ug medical personnel sa mga locator sa Mactan Export Processing Zone (Mepz) sa mga vaccination site sa dakbayan.
Kini gumikan sa kakuwang sa mga doktor nga boluntaryong misanong sa panawagan sa kagamhanan.
Plano unta sa kagamhanan nga mang-hire og doktor sulod sa tulo ka mga buwan aron masigurong adunay mo duty nga mga medical personnel sa mga vaccination site sa dakbayan gumikan kay gamay ra ang nipadayag nga mo-volunteer.
Ubos sa plano, ang usa ka doktor sa mga locator sa Mactan Export Zone (MEZ) mo-duty og usa ngadto sa duha ka adlaw sa ilang dayoff aron makatabang sa pagpamakuna sa kagamhanan.
Gipahibawo usab ni Chan nga siya mosuwat sa kadagkuan sa Philippine Air Force (PAF) aron usab nga mo-duty ang ilang mga doktor ug nurses sa ilang libreng oras sa mga vaccination site sa dakbayan.
“Yeah ni-commit sila ang ato lang mopadala ko ug formal letter para formal gyud. Nindot ni nga development,” matod ni Chan.
Kagahapon, Hunyo 11, ang dakbayan nakadawat na usab og dugang 11,000 ka doses sa Pfizer nga bakuna nga gikatakdang ilang ipangturok
ngadto sa mga Oponganon sunod semana.
Aduna usay lain nga mga dose sa Sinovac nga moabot gikan sa Department of Health DOH-7, sumala ni Chan. (GCM)