Gihimo ang kinalit nga drug test sa City of Lapu-Lapu Office Substance Abuse and Prevention (C-Losap) sa mga sakop sa Material Recovery Facility (MRF) sa Soong, Barangay Mactan, dakbayan sa Lapu-Lapu kagahapon Hunyo 11.
Moabot 229 ka kawani sa maong buhatan apan 189 lang ang mitunga, 40 ang absent.
Matod sa pangulo sa C-Losap nga si Garry Lao dili hinuon pasabot nga naglikay ang 40 ka nangabsent sa drug test sanglit wala man usab sila masayod sa pagpahigayon og drug test.
Pagpasabot ni Lao nga gipahibawo ang tanang kawani sa MRF pinaagi sa memo gikan sa ilang labaw niadtong Hunyo 10 nga adunay orientation kalabot sa bakuna.
“Nang-absent lang gyud siguro sila or nahadlok ba sa bakuna. I dont know kay wala man gyuy nakabawo ani random man gyud ni,” matod ni Lao sa pangutana nga wala ba kaha makabantay kini.
Gikatakda hinuong mopasabot sa ilang labaw ang nang-absent ug unsa ang ilang rason, sumala ni Lao, apan gikatakda gihapon silang mopaubos sa drug test karong Lunes, Hunyo 14.
Nasayran nga niadtong Disyembre 2019 gipaubos usab sa kinalit nga drug test ang mga kawani sa naasoyng buhatan diin upat ang nagpositibo sa gidiling druga.
Ang pagpaubos sa kinalit nga drug test subay gihapon sa kampanya sa kagamhanan sa pagsigurong walay tiggamitan ug illeal nga drugas sa mga kawani sa Lapu-Lapu City Hall.
“Wala man gyud ta ingon nakadawat ug info or whatsoever nga naay tiggamitan nila ug illegal nga drugas random lang gyud ni siya sa matag department in line sa campaign sa atong Mayor nga drug free workplace,” matod ni Lao sa Superbalita Cebu. / GCM