Apas-sumpay sa akong lindog sa miaging Sabado mahitungod sa mga prutas nga daghan og kamay, ang akong hisgutan karon mga utanon ug lagutmon na sab nga angay likayan labi na sa mga diabetic kay taas og daghang kamay.

Ubay-ubay ang nagtuo nga ang tanang klasing utanon ug lagutmon parehas ra apan para sa mga diabetic maka-libog kini.

Sa artikulo nga akong nabasa nga giulohan og ‘Taste of Home’ nga sinuwat ni Wendy Jo Peterson, MS, RDN, iyang gibuakbuak ug gihimayhimay pag-ayo ang mga maayo ug makadaot nga utanon labi na niadtong mga kandidato sa diabetes o dunay kaliwat nga diabetic.

Ang pagkahibalo ug pagkat-on mahitungod ining blood sugar ug carbohydrates (carbs) dako og matabang labi na og ang imong kabanay dunay diabetes o kaliwat dayabitison.

Tinuod nga kasagaran sa mga utanon ug lagutmon makaayo sa atong panlawas apan angay hinumduman nga bantayan sab ang sulod nga carbs ini.

Kining mga utanon nga starchy kon tayubungon taas sab og carbs maong angay bantayan ang gidaghanon inig kaon ini. Unya paresan sab og protina nga taas og tambok (higher fat foods) para di mobugway ang kamay sa dugo.

Pananglitan og hilig gyod og patatas, butternut squash, mais o ba kaha peas, angay kining paresan og sinugba o baked nga salmon o broccoli imbis pure nga mashed potatos unya pinarisan pa gayod og fried chicken sama sa mga baligya sa fast foods nga mangamay sa kahumot kay seguradong mobugway ang kamay sa lawas.

Kining patatas, labi na og prituhon sama sa French fries, hilabihang taasa og tayubong busa angay likayan kung mahimo.

Hinuon kining mosunod maoy da best nga utanon nga angay kan-on: carrots, broccoli, cabbage, asparagus, cauliflower ug kyle. Kini taas og sulod nga fiber nga makapugong pagbugway sa kamay sa dugo. Daghan sab ni og fiber, vitamins og minerals gawas nga lami og lasa.

Angay sab daghanon ang pagkaon og tambok nga isda (fatty fish), itlog, berding mga utanon, avocado, beans, Greek yogurt ug mga nut.