Aduna na lang lima ka mga adlaw nga huwaton ug magsugod na ang 3rd window sa 2021 Fiba Asia Cup qualifiers sa Clark, Pampanga apan wala gihapo’y tubag kining dakong pangutana: Makaduwa kaha si Kai Sotto sa Gilas Pilipinas?
Mao kini ang plano sa Samahang Basketbol ng Pilipinas (SBP) alang sa batan-ong Pinoy nga higante, kinsa midalikyat pagbalik dinhi sa nasod sa pamasin nga makatabang siya sa kampanya sa Gilas Pilipinas.
Gani, matod sa kasaligang tinubdan sa Spin.ph nga moduwa ang 7’3” ug 18 anyos nga basketbolista sa Gilas sa duha ka dagkong mga kompetisyon una kini mobalik sa Amerika aron ipadayon ang hugot niyang pagbansaybansay alang sa iyang pagduwa sa Adelaide 36ers sa National Basketball League (NBL) sa Australia.
Apan naguba ang eskedyul ni Sotto gumikan kay sa iyang pag-abot sa nasod, niagi pa siya sa estriktong health protocols ug 14-day quarantine nga gipatuman sa gobiyerno isip lakang sa pagpakigbatok sa Covid-19.
Ang Fiba Asia Cup qualifiers gikatakda karong Hunyo 16-20 ug hangtod ning puntoha, wala pa’y kaseguroan kon kanus-a makauban si Sotto sa Gilas.
Si SBP program director Tab Baldwin maoy gitahasan sa pagdesisyon kon ilakip ba niya o dili si Sotto sa final lineup sa Gilas. / ESL