Dili makatunga si Filipino boxing legend Manny Pacquiao sa State of the Nation Address (Sona) ni Presidente Rodrigo Duterte nga gikatakda sa ulahing bahin sa Hulyo 2021.
Kini gumikan kay molarga na ang fighting senator sa Amerika aron sugdan ang hugot niyang pagbansaybansay sa Wild Card gym ubos sa paggiya ni Hall of Fgame trainer Freddie Roach.
Ang Pambansang Kamao ng Pilipinas hinayhinay nang nagsugod sa iyang training alang sa umaabot niyang dakong tahas batok kang World Boxing Council (WBC) ug International Boxing Federation (IBF) welterweight king American Errol Spence Jr.
Ang panagharong nila ni Pacquiao ug Spence gikatakda karong Agusto 21 sa Las Vegas.
“Before Sona . . . second week of July,” tubag ni Pacquiao sa pangutana ni boxing journalist Nick Giongco sa YouTube kabahin sa kon kanus-a mag-training sa Amerika ang bugtong 8-division world champion sa tibuok kalibutan.
Gipasabot ni Pacquiao, 42, nga kinahanglan niyang motagana og usa ka buwan alang sa hugot niyang pagbansaybansay gumikan kay sayod siyang dili sayon nga kontra ang mas batan-ong si Spence.
Gawas nga mas batan-on, aduna sab saktong abilidad ug kusog ang 31 anyos nga si Spence, kinsa sama ni Pacquiao, usa sab ka walhon.
“My concern is he’s younger. Pero mabilis pa rin naman ako at ‘yung uhaw ko sa taas ng ring nandoon pa rin,” batbat ni Pacquiao.
Gipasabot ni Pacquiao nga personal niyang giestudyohan ang estilo ni Spence dihang nagtan-aw siya sa ringside sa away niini batok kang Mikey Garcia niadtong 2019.
“Lahat naman ng suntok malakas e, basta mapatama ka,” dugang ni Pacquiao. “Kaliwete ito, pero pinagaralan kong mabuti ‘yung style niya.”
Sa laing interbyu, ang usa sa mga nakontra na ni Pacquiao nga si kanhi world champion Adrien Broner nagtuo nga mabun-og ug ma-knockout si Pacquiao batok kang Spence.
Gipasabot ni Broner nga dako ra ug mas kusog og kumo si Spence kumpara ni Pacquiao.
“I think (Pacquiao is) going to run into a left hand (from Spence),” matod ni Spence sa interbyu sa ESNEWS.
“I think Eroll will be a liitle too big, too strong. HE can probably stop him.” / ESL