TUNGOD sa padayon nga pagsaka sa mga kaso sa coronavirus disease (Covid-19) sa lalawigan sa Bohol, Negros Occidental ug Negros Oriental, mangayo na og negative reverse transcription-polymerase chain reaction (RT-PCR) o rapid antigen test result ang mga mobiyahe gikan sa mga nahisgutang lugar sa dili pa kini mopaingon sa Sugbo.
Kini maoy nalatid sa bag-ong kamandoan ni Cebu Governor Gwendolyn Garcia nga Executive Order No. 22, "Regulating the Entry of persons into the Province of Cebu who originate from Bohol, Negros Oriental and Negros Occidental."
Nahisubay kini sa nahiusahang desisyon sa mga direktor sa Department of Health (DOH), Department of Interior and Local Government ug Office of the Presidential Assistant for the Visayas nga kinahanglan na ang pagpatuman sa mas hugot nga restrictions sa mga tawo nga gikan sa naasoyng mga dapit.
Sa nasayran, adunay moabot sa 2,528 na nga aktibong kaso sa coronavirus disease sa lalawigan sa Negros Oriental samtang 1,095 sa lalawigan sa Bohol.
Samtang sa kinatibuk-an nga 128 ka mga probinsya ug syudad sa nasud, anaa sa ikaduha nga spot sa may pinakadaghang kaso ang Negros Oriental, samtang ika-28 usab ang Bohol subay sa pagsulbong sa mga kaso niini.
Subay niini, gitahasan ang DOH sa pagpahigayon og rapid antigen test sa tanang ports of origin alang sa tanang mga mo byahe paingon sa Sugbo.
Ang tanang sakop sa Philippine Ports Authority ug Philippine Coast Guard ang gitahasan sa pagsusi o pag-screen sa mga pasahero. (ANV)