Phoenix mituhak sa Nuggets

GIPAKGANG sa Phoenix Suns ang selebrasyon sa Denver Nuggets gumikan sa pagkasakmit ni Nikola Jokic sa most valuable player human ilang gikuniskunis 116-102 sa conference semi-finals sa National Basketball Association

Gumikan sa maong kapildehan, nag-utaw-otaw na sa kawanangan ang Phoenix kinsa nagkinahanglan nalang og usa ka kadaog sa ilang best of seven series para angkunon ang usa ka lingkuranan sa conference finals sa West kinsa naghupot og 3-0 win-lose record. Ang game four karong Lunes.

Si Devin Booker ug Chris Paul sa Suns maoy mga kontrabida sa selebrasyon sa Nuggets kinsa nipaarak og 28 ug 27 puntos matag usa samtang nikulit og franchise record si Jokic nga maoy labing unang player nga nakahimo og 32 puntos, 20 rebounds ug 10 assists sa playoffs.

Ang lima ka starters sa Suns pulos nipupo og double digit para sa ilang balanse nga ataki.

Ang Suns nagkinahanglan nalang og usa ka daog aron makabalik sila sa Western Conference Finals diin katapusan silang nakaabot niadtong 2009-2010 season nga mao sab ang ilang katapusan nga pagsulod sa playoffs.

Ang third-seeded nga Nuggets kinsa maoy nibangga sa Los Angeles Lakers sa conference finals nameligro nga masilhig mismo sa ilang kaugalingon nga korte ug maoy labing una human sa first round niadtong 2008 diin sila gianod sa baha sa Lakers.

Si Jokic nipahinungod sa iyang MVP trophy ngadto sa iyang mga teammates atol sa gipahigayon nga seremonyas sa wala pa magsugod ang duwa nga gituohan ni coach Michael Malone nga makapalagsik sa iyang mga batos kinsa gipilde og 17, 25 ug 14 puntos sa tulo ka mga duwa.

Si Malone kinsa nisaway sa iyang mga mga player nga ni-surrender atol sa tambak nga duwa sa game 2 niingon nga nakauyon siya sa gipakitang performance.

“I don’t know if I’ve ever been around a better team that can get up off the mat, find a way to get back in the fight and win the fight,” padayag ni Malone kansang team nibangon sa 3-1 deficit sa NBA bubble.

Ang Suns naglabaw og double digits sa first half apan kalit nga namugnaw sa nahabiling 90 segundos sa second quarter nga maoy naghatag og agianan sa Nuggets aron makadikit, 59-55, sa half time diin sila nipasulod og 50% sa ilang field goals apil na sa three-point line ug napasulod ang ilang 11 ka free throws.

Samtang ang Nuggets wala makapasulod sa ilang unang pito ka itsa human sa halftime nga maoy gigamit nga armas sa Suns para ilang mabiyaan ang team ni Jokic. (PAC)

Related Stories

No stories found.
SunStar Publishing Inc.
www.sunstar.com.ph