Duna man tuoy inilog tungod sa bintaha sa tapad, apan sa walo ka mga teams nga nahabilin sa nagpadayon nga playoffs sa NBA di pa gyud nato masiguro kon kinsa ang makalabni sa 2021 championship.
Ang sayong pagbakasyon sa mga inila o dominanting teams sa lega, naghatag sa uban og kahigayonan nga makalabni sa ilang unang titulo.
Sa walo, tulo lang ang nakaagi og kampiyon. Kini mao ang Philadelphia Sixers (1983), Milwaukee Bucks (1971) ug Atlanta Hawks. Ang laing lima nga mao ang Utah Jazz, Phoenix Suns, Brooklyn Nets, Los Angeles Clippers ug Denver Nuggets padayon pang nagkampanya aron makalangkat sa ilang unang kapiyonato.
Gawas nga wa pay titulo, duha niining lima - ang Clippers ug ang Nuggets - nga pulos Western Conference teams maoy wa pa gyud kataak sa NBA finals.
Sa sitwasyon karon, pabilin nga subidahon gihapon kaayo ang ilang kahimtang. Ang Nuggets wala pay nagdag-an sa tulo nila ka duwa batok sa Phoenix Suns sa best-of-seven human sa ilang 116-102 nga kapildihan sa Game Three diha mismo sa ilang korte.
Samtang ang Clippers nabiyaan na usab, 0-2, sa ilang kaugalingong series batok sa Jazz.
Ang Clippers mao na usab ang mo-host sa serya alang sa Game Three karong adlawa. Hinuon dili bag-o nila ang maong sitwasyon.
Sa first round sa playoffs batok sa Dallas Mavericks wa usab silay nadag-an sa unang duha ka duwa, apan mibawos ug mao pay midaog sa series, 4-3.
Pero kon mapildi gihapon sila karon batok sa nagkainit nga Jazz, hayag ang posibilidad nga magpabilin gihapon silang dili makataak sa finals, ilabi na nga padayong wala ang ilang bigman nga si Serge Ibaka tungod sa injury niini sa buko-buko.
* * *
Human makaangkon og angol sa first round, ang higanti sa Philadelphia Sixers nga si Joel Embiid hinayhinay nang naka recover sa second round batok sa Atlanta Hawks.
Sa ilang kapildihan sa Game One, mitali siya og 39 puntos ug siyam ka rebounds, sa Game Two 40 puntos ug 13 rebounds ug 27 puntos, siyam ka rebounds ug walo ka assists sa Game 3.
Di makapugong kaniya ang Hawks ug dinhi gipamatuod ni Embiid kon nganong nahimo siyang ikaduhang kandidato sa pagka MVP.
Sa iyang gidak-on, kutob ra gyud sa foul ang modepensa ug gani sa Game Three, 16 ka higayon siya nahatod sa free throw line.
Gipakuratan sila sa Hawks sa Game One tungod kay maayong nakaduwa ang mga bench sa Atlanta, apan nausab ang dagan sa Games Two ug Three ug matataw ang ilang dominasyon.
Pero kon gusto gyud sa Sixers nga motunhay ang ilang kampanya, kinahanglan mohatag usab og igong suporta ang uban. Kon sa Game Two si Shake Milton maoy mibida, lahi ang sa Game Three kay milihok man ang mga backups ni Embiid sama nila ni Tobias Harris ug Ben Simmons.
Ang bugtong titulo sa Sixers ilang nalangkat niadtong 1983. Panahon pa ni nila ni Julius Irving ug Moses Malone diin ilang giharos sa best-of-seven championships ang Los Angeles Lakers.
Apan katapusan nakataak ang Philadelphia sa finals niadto pang 2001 ubos sa pagpangulo ni Allen Iverson. Ning higayona gipildi sila sa Lakers nga gibituonan nila ni Shaquiel O’Neal ug Kobe Bryant.
Makabalik kaha sa finals ang Sixers sa karon nga season? Dako ang kahigayonan, apan magdepende lang kini kon 100 percent nga piskay si Embiid. jun.migallen22.gmail.com